Ketan Agarwal: सियाच्या भयंकर कृत्यानं वडिलांना मानसिक धक्का, ICU मध्ये उपचार; आई म्हणाली, तिलाही लोहगडावरुन ढकलून द्या

Siya Goyal Lohagad Fort News : पुण्यातील लोहगडावरील केतन अग्रवाल हत्याकांडातील मुख्य आरोपी सिया गोयलचे वडील प्रवीण गोयल यांची प्रकृती अचानक खालावल्याने त्यांना रुग्णालयात दाखल करण्यात आले आहे. छातीत तीव्र वेदना होत असल्याची तक्रार केल्यानंतर त्यांना रुबी हॉल क्लिनिकमध्ये उपचारासाठी दाखल केल्याचे वृत्त आहे. मिळालेल्या माहितीनुसार, प्रवीण गोयल यांच्यावर आयसीयूमध्ये उपचार सुरू आहेत. केतन हत्याकांडाच्या सुरू असलेल्या तपासाच्या प्रचंड तणावामुळे त्यांना हृदयविकाराचा झटका आल्याचे वृत्त आहे.

प्रवीण गोयल यांच्या प्रकृतीवर लक्ष ठेवण्यासाठी आणि आयसीयूच्या सभोवतालचा परिसर सुरक्षित करण्यासाठी रुग्णालयाच्या आवारात कडक निगराणी ठेवण्यात आली आहे. प्रशासनाने कुटुंबावर बारकाईने लक्ष ठेवले असून, डॉक्टर आरोपीच्या वडिलांच्या प्रकृतीतील सुधारणेवर सतत लक्ष ठेवून आहेत. १८ जून रोजी केतन अग्रवालची हत्या झाली. सुरुवातीला हा एक अपघात असल्याचे म्हटले गेले. नंतर, तपासात हा अपघात नसून खून असल्याचे उघड झाले. पोलिसांनी या प्रकरणी केतनची होणारी पत्नी सिया गोयल आणि तिचा मित्र चेतन चौधरी यांना अटक केली आहे.

सिया गोयलनं होणाऱ्या नवऱ्याला बॉयफ्रेंडच्या मदतीने मारल्याचं समजताच वडिलांना प्रचंड मानसिक धक्का बसला. त्यांना रुग्णालयात दाखल करण्यात आले असून ICU उपचार घेत आहेत. सियाच्या आई-वडिलांनी रुग्णालयातून प्रसारमाध्यमांशी संवाद साधला. त्यावेळी या दोघांनाही सिया दोषी असेल तर तिला कठोर शिक्षा झाली पाहिजे, असे स्पष्टपणे सांगितले. सियाची आई म्हणाली की, केतनच्या हत्या प्रकरणात सिया दोषी आढळली, तर तिलाही त्याच किल्ल्यावरून खाली ढकलून द्यावे, अशी संतप्त प्रतिक्रिया सियाचे वडील आणि आई यांनी दिली. आरोपी सियाचे वडील प्रवीण गोयल म्हणाले की, माझी मुलगी असे कृत्य करू शकते यावर विश्वास बसत नाही.

मीडियाशी बोलताना सियाची आई म्हणाली की, ते एकमेकांशी व्हिडिओ कॉलवर बोलायचे. ते आनंदी होते. केतन जेवणासाठी आमच्या घरीही आला होता. काहीतरी अयोग्य घडत असल्याचे कोणतेही संकेत आम्हाला कधीच दिसले नाहीत. जर सियाने केतनसोबत लग्न करायचे नाही, असे सांगितले असते तर लग्नाच्या खरेदीवर इतका खर्च का केला असता? आम्ही मोठ्या उत्साहाने लग्नाची तयारी करत होतो. पण सगळ उद्ध्वस्त झालं.