संघर्ष गांगुर्डे, साम टीव्ही
कल्याण पोलिसांनी महाराष्ट्र संघटित गुन्हेगारी नियंत्रण कायद्याअंतर्गत मोठी कारवाई करत, कल्याण रेल्वे स्टेशन परिसरात चालणाऱ्या एका मोठ्या वेश्याव्यवसाय रॅकेटचा पर्दाफाश केला आहे. पोलिसांनी टोळीच्या म्होरक्यासह सर्व ८ आरोपींना अटक केली आहे. या कारवाईदरम्यान, वेश्याव्यवसायात जबरदस्तीने ढकललेल्या २० पीडित महिलांची सुटका करण्यात आली. पोलिसांच्या माहितीनुसार, २१ फेब्रुवारी २०२६ रोजी महात्मा फुले चौक पोलीस ठाण्यात दाखल केलेल्या एका गुन्ह्याच्या तपासादरम्यान असे उघड झाले की, पुरुष आणि महिला आरोपींनी मिळून एक संघटित टोळी तयार केली होती आणि आर्थिक फायद्यासाठी, ते महिलांना पैशांचे आमिष दाखवून आणि दबाव टाकून वेश्याव्यवसायात ढकलत होते.
ही टोळी बऱ्याच काळापासून ग्राहकांना महिलांची वाहतूक करून अवैध उत्पन्न मिळवत होती. तपासात असेही उघड झाले की, आरोपींकडे उत्पन्नाचे कोणतेही कायदेशीर साधन नव्हते आणि ते पूर्णपणे संघटित गुन्हेगारीतूनच आपले उत्पन्न मिळवत होते. या आधारावर, अतिरिक्त पोलीस आयुक्त यांच्या मंजुरीनंतर या प्रकरणात मकोकाची कलमे जोडण्यात आली. तपासादरम्यान, यापूर्वी अटक केलेल्या पाच महिला आरोपींना न्यायालयाच्या परवानगीने पुन्हा अटक करण्यात आली आणि फरार आरोपी प्रशांत उर्फ काया वीरकुमार गायकवाड याला १५ जुलै रोजी अटक करण्यात आली.
त्यानंतर, टोळीचा सदस्य हिमायत सय्यद आणि फरार महिला आरोपी मोटा नारायण बारीक हे पश्चिम बंगालमध्ये लपून बसल्याची माहिती पोलिसांना मिळाली. वरिष्ठ अधिकाऱ्यांच्या सूचनेनुसार, एक पोलीस पथक पश्चिम बंगालला पाठवण्यात आले. २४ दक्षिण परगणा येथील डायमंड हार्बर पोलीस ठाण्याच्या मदतीने, दोन्ही आरोपींना ११ जुलै रोजी अटक करून ट्रान्झिट वॉरंटवर कल्याणला आणण्यात आले. मंगळवारी, दोन्ही आरोपींना मकोका न्यायालयासमोर हजर करण्यात आले आणि पोलीस कोठडी सुनावण्यात आली.
कल्याणचे डीसीपी अतुल झेंडे सांगितले की, या प्रकरणातील सर्व आरोपींना आतापर्यंत अटक करण्यात आली असून, २० पीडित महिलांची सुखरूप सुटका करण्यात आली आहे. ही संपूर्ण कारवाई पोलीस आयुक्त आशुतोष ज्ञानेश्वर जाधव आणि पोलीस उपआयुक्त अतुल झेंडे यांच्या देखरेखीखाली पार पाडण्यात आली. या प्रकरणाचा पुढील तपास सुरू आहे. सहायक पोलीस आयुक्त अशोक होनमाने हे तपास करत आहेत.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.