Pune Rain Updates: पुण्यात मेघगर्जनेसह पावसाच्या जोरदार सरी; बाप्पाच्या दर्शनासाठी आलेल्या भाविकांची धावपळ

Pune Rain Latest Updates

मंगळवारी रात्री पुणे शहराला मुसळधार पावसाने झोडपून काढलं. पण बुधवारची पहाट उगवताच पावसाने थोडीफार विश्रांती घेतली. त्यामुळे गणपती बाप्पाच्या दर्शनासाठी पुणेकर घराबाहेर पडले. मात्र, ११ वाजेच्या सुमारास पुण्यात पुन्हा ढग दाटून आलं आणि जोरदार पावसाला सुरुवात झाली. त्यामुळे पुणेकरांची पुरती तारांबळ उडाली. (Latest Marathi News)

सध्या पुण्यातील मध्यवर्ती भागासह उपनगरात पावसाच्या सरी (Rain News) कोसळत आहेत. अचानक आलेल्या या पावसामुळे गणपती दर्शनाला घराबाहेर पडलेल्या भाविकांची चांगलीच तारांबळ उडाल्याचं दिसून आलं. ढगांच्या गडगडाटासह सुरू झालेल्या या पावसामुळे शहरातील काही भागातील रस्त्यावर पाणी साचलं होतं.

यामुळे वाहनचालकांची देखील मोठी दमछाक झाली. दरम्यान मंगळवारी शिवाजीनगर आणि लोहेगाव या दोन्ही भागात रात्री 8.40 वाजेपर्यंत 26 मिमी पावसाची नोंद झाली. शिवाजीनगर, पेठ परिसर, डेक्कन, कोथरुड, कर्वेनगर, विश्रांतवाडी, कात्रज, बाणेर, पाषाण, कोंढवा, सिंहगड रोड, लोहेगाव, हडपसर या भागात मंगळवारी सायंकाळी सात वाजल्यानंतर जोरदार पाऊस झाला.

रात्री उशिरापर्यंत पुण्यात पावसाचा जोर कायम होता. त्यामुळे गणपती बाप्पाच्या (Ganeshotsav 2023) दर्शनासाठी घराबाहेर पडणं पुणेकरांनी टाळलं. बुधवारची पहाट उगवताच शहरात पावसाने थोडीफार विश्रांती घेतली. त्यामुळे अनेक भाविक बाप्पाच्या दर्शनासाठी बुधवार पेठ, कसबा पेठेत दिसून आले.

मात्र, ११ वाजता पुन्हा पुण्यात पावसाला सुरुवात झाली. सध्या पुणे शहरासह मध्यवर्ती भागात पावसाच्या जोरदार सरी कोसळत आहे. हवामान खात्याने पुणे, मुंबईसह कोकणातील पालघर, ठाणे, रत्नागिरी, सिंधुदुर्ग, रायगड या जिल्ह्यांना आज यलो अलर्ट देण्यात आला आहे.

Edited by - Satish Daud