Kalyan Pali Bus : कल्याण-डोंबिवली ते पाली एसटी बस सेवा सुरू, प्रवाशांना दिलासा; वेळापत्रक जाणून घ्या

अमित गवळे सकाळ वृत्तसेवा

सुधागड तालुक्यातल्या चाकरमानी, ग्रामस्थ आणि पर्यटकांसाठी ही अत्यंत महत्वाची बातमी आहे. कल्याण - डोंबिवलीपासून ते पालीपर्यंतच्या सेवा ८ जूनपासून सुरु करण्यात आली आहे. या बस सेवेचे पालीमध्ये आगमन होताच तिथल्या स्थानिक शिवसेना पदाधिकारी आणि नागरिकांच्यानी बसचं जल्लोषात जंगी स्वागत केलं.

स्वागताच्या वेळी उपस्थित शिवसेना जिल्हा समन्वयक रायगडचे राजेंद्र राऊत, तालुकाप्रमुख अनुपम कुलकर्णी, पाली शहर प्रमुख ओमकार खोडागळे, शहर संपर्क प्रमुख विनायक जाधव, अवजड वाहतूक सेना प्रमुख शरद फोंडे, सुबोध पालांडे तसेच अनेक पदाधिकारीही उपस्थित होते. तसेच मोठ्या संख्येने महिला, नागरिक आणि लहान मुलंही या कार्यक्रमात सहभागी झाली होती.

पाली आणि सुधागड परिसर हा धार्मिक आणि पर्यटनदृष्ट्या महत्त्वाचा मानला जातो. अष्टविनायकांपैकी बल्लाळेश्वर गणपती मंदिर , सुधागड आणि सरसगड किल्ला पाहण्यासाठी मुंबई, ठाणे, कल्याण आणि डोंबिवली भागातून मोठ्या संख्येने पर्यटक जात असतात. तसेच या भागातले बरेच नागरिक रोजगारासाठी कल्याण-डोंबिवली परिसरात जात असल्याची माहिती मिळाली. त्यामुळे ही बस सेवा त्यांच्यासाठी फायदेशीर ठरणार आहे.

शिवसेना रायगड जिल्हा समन्वयक राजेंद्र राऊत यांनी परिवहन मंत्र्यांकडे या बस सेवेची मागणी केली होती. त्यानंतर ही सेवा पुन्हा सुरू करण्यात आली आहे. त्यामुळे आता प्रवासी, विद्यार्थी आणि पर्यटकांचा प्रवास जास्त सोयीस्कर झाला आहे.

बसचे वेळापत्रक

• कल्याण (विठ्ठलवाडी) येथून सुटण्याची वेळ: सकाळी ८.३० वाजता

• पाली येथून परतीची वेळ : दुपारी १.३० वाजता