Pune Porsche Accident: ससून रूग्णालयातील डॉ. अजय तावरेंच्या अडचणी वाढणार? आणखी एका प्रकरणात गंभीर आरोप

सचिन जाधव, साम टीव्ही पुणे

पोर्शे अपघात प्रकरणात अटकेत असणारे ससून रूग्णालयातील वरिष्ठ अधिकारी डॉ अजय तावरेंच्या अडचणी वाढताना दिसत आहेत. डॉक्टर तावरेंनी २०१८ मध्ये देखील असाच एक चुकीचा रिपोर्ट दिल्याचा आरोप केला जात आहे. डॉ. तावरेंवर हा आरोप शिरूरच्या मुलानी आणि शेख कुटुंबीयांनी केला आहे. या आरोपांनतर आता डॉ. तावरेंच्या अडचणी आणखी वाढणार का? असा प्रश्न निर्माण होत आहे.

याबाबत सविस्तर वृत्त असं की, रेहाना शेख यांचा ११ ऑगस्ट २०१८ मध्ये प्रसूतीनंतर (Sasoon Hospital) मृत्यू झाला होता. प्रसूतीनंतर मोठ्या प्रमाणात रक्तस्त्राव झाला, मात्र संबंधित डॉक्टरने रक्त उपलब्ध करून ठेवलं नव्हतं. डॉक्टरांच्या हलगर्जीपणाने हा मृत्यू झाल्याचा आरोप रेहाना यांचे भाऊ आणि पतीने केला होता. यावेळी या प्रकरणाची (Fake Report Allegations On Dr Ajay Taware) चौकशी करण्यासाठी पावलं उचलली गेली होती.

त्यावेळी डॉक्टर अजय तावरेंच्या अध्यक्षतेखाली चौकशी नेमली गेली होती. मात्र तावरेंनी २७ नोव्हेंबर २०१८ ला डॉक्टरांच्या बाजूने अहवाल दिला. मग या कुटुंबाने ब्लड बँकेतून २१ जानेवारी २०१९ रोजी रीतसर माहिती घेतली होती. तेव्हा डॉक्टर तावरेंनी पैश्यांसाठी चुकीचा अहवाल दिल्याचं या दोन्ही कुटुंबियांच्या लक्षात आलं (Dr Ajay Taware) होतं.

मुलानी आणि शेख कुटुंबियांना अद्याप न्याय मिळाला नाही. त्यांचा न्यायालयीन लढा सुरू आहे. पालकमंत्र्यांनी याप्रकरणी लक्ष घालून न्याय द्यावा, अशी मागणी या कुटुंबीयांनी केली आहे. परंतु पोर्शे अपघातामध्ये (Pune Porsche Accident) डॉ. तावरेंवर कारवाई करण्यात आलीय. त्यामुळे शेख आणि मुलांनी कुटुंबीयांनी पुन्हा एकदा आवाज उठवला आहे.