एकनाथ शिंदे मुख्यमंत्री होणार? 'त्या' बॅनरने राजकीय वर्तुळात चर्चांना उधाण

पुणे: दहीहंडी उत्सवाच्या निमित्ताने पुणे शहरात राजकीय फ्लेक्सबाजी रंगली असून, हांडेवाडी भागात शिवसेना शिंदे गटाचे नेते आणि शहर प्रमुख प्रमोद नाना भानगिरे यांनी लावलेला एक फ्लेक्स सध्या चर्चेचा विषय ठरत आहे.

उपमुख्यमंत्री एकनाथ शिंदे यांच्या फोटोसह "लाडका भाऊ लवकरच मुख्यमंत्रीपदी विराजमान होणार असा थेट मजकूर या फ्लेक्सवर छापण्यात आला आहे. तसेच यावर "लाडक्या बहिणींचा आशीर्वाद असेही नमूद करण्यात आले असून शिवसेनेचे संस्थापक शिवसेनाप्रमुख बाळासाहेब ठाकरे आणि धर्मवीर आनंद दिघे यांचे फोटोही या फलकावर स्पष्टपणे दिसून येत आहेत.

गेल्या काही दिवसांपासून मुख्यमंत्री देवेंद्र फडणवीस हे केंद्रात जाणार असल्याच्या चर्चा राजकीय वर्तुळात सुरू आहे. शिक्षणमंत्री धर्मेंद्र प्रधान यांनी राजीनामा दिल्यानंतर या चर्चांना जोर आला होता. तसेच देवेंद्र फडणवीस हे उपपंतप्रधान होणार असा दावा अलीकडेच ठाकरे गटाचे खासदार संजय राऊत यांनी केला आहे. त्यामुळे अशा वातावरणात पुण्यासारख्या महत्त्वाच्या शहरात एकनाथ शिंदे यांना 'भावी मुख्यमंत्री' म्हणून प्रस्थापित करणारे फ्लेक्स लागल्यामुळे राजकीय वर्तुळात निरनिराळ्या चर्चांना उधाण आले आहे.

दहीहंडीच्या मुहूर्तावर झळकलेल्या या पोस्टरने शहरातील नागरिकांचे आणि कार्यकर्त्यांचे लक्ष वेधून घेतले असून, महायुतीमधील राजकीय समीकरणांवर याचा काय परिणाम होतो, हे पाहणे महत्त्वाचे ठरणार आहे.