Dombivali: डोंबिवली हादरली! रिक्षाचालकाकडून गतिमंद महिलेवर अत्याचार; अज्ञातस्थळी नेलं अन्...

अभिजीत देशमुख, साम टीव्ही

राज्यात अत्याचाराच्या घटनांमध्ये वाढ झाली आहे. अशातच डोंबिवलीतून एक धक्कादायक बातमी समोर येत आहे. डोंबिवलीत एका ३० वर्षीय गतिमंद महिलेवर रिक्षाचालकाने अत्याचार केल्याची संतापजनक घटना समोर आली आहे. ही गतीमंद महिला आपल्या नातेवाइकांकडे जात होती. यावेळी रिक्षाचालकाने तिला अज्ञात ठिकाणी नेऊन अमानुष कृत्य केलं.

या प्रकरणाची माहिती पोलिसांना मिळाल्यानंतर त्यांनी काही तासांत आरोपी फैजल खानला अटक केली आहे. या प्रकरणी पुढील तपास पोलिसांकडून सुरू आहे.

नेमकं प्रकरण काय?

डोंबिवली शहरात एका ३० वर्षीय गतिमंद महिलेवर रिक्षाचालकाने अत्याचार केला आहे. पीडित महिला सोनारपाडा येथील नातेवाइकांकडे जात होती. यावेळी रिक्षाचालकाने महिला गतिमंद असल्याचा फायदा घेत तिला मुंब्रा येथील अज्ञात ठिकाणी नेले. तसेच तिच्यावर अमानुष अत्याचार केला. दुसऱ्या दिवशी पीडितेने घडलेला प्रकार आपल्या कुटुंबाला सांगितला.

याप्रकरणाची माहिती पीडित कुटुंबाला मिळाल्यानंतर त्यांनी टिळक नगर पोलीस ठाण्यात धाव घेतली. तसेच आरोपीविरोधात तक्रार दाखल केली. फैजल खान असे या आरोपी रिक्षाचालकाचे नाव असून, टिळक नगर पोलिसांनी आरोपीचा शोध घेऊन त्याला तत्काळ कारवाई करत अटक केली आहे.

या प्रकरणाचा पुढील तपास पोलीस करीत असून, आरोपीला कठोर शिक्षा व्हावी, अशी मागणी परिसरातील नागरिकांकडून होत आहे. या संतापजनक घटनेनंतर ग्रामस्थांनी रोष व्यक्त केला आहे.