Dombivali Crime: डोंबिवली हादरली! २ अल्पवयीन मुलींवर बलात्कार, पीडिता राहिल्या गरोदर

• डोंबिवलीत अल्पवयीन मुलींवर बलात्कार

• पीडित मुली गरोदर राहिल्यानंतर प्रकरण उघड

• दोन्ही आरोपींना पोलिसांनी केली अटक

• या घटनांमुळे डोंबिवली हादरली

संघर्ष गांगुर्डे, डोंबिवली

कल्याणमध्ये १४ वर्षांच्या मुलीवर बलात्कार करण्यात आल्याची घटना ताजी असतानाच डोंबिवलीतून अशीच धक्कादायक घटना समोर आली आहे. डोंबिवलीमध्ये २ ठिकाणी अल्पवयीन मुलींवर लैंगिक अत्याचार करण्यात आल्याच्या घटना घडल्या. दोन्ही पीडित मुली गरोदर राहिल्यानंतर हे प्रकरण उघडकीस आले. या दोन्ही प्रकरणातील आरोपींना पोलिसांनी अटक केली असून याप्रकरणाचा तपास पोलिस करत आहेत.

मिळालेल्या माहितीनुसार, डोंबिवलीत २ अल्पवयीन मुलींवर लैंगिक अत्याचाराची घटना घडली. एका प्रकरणात मानपाडा पोलिसांनी काजू निषाद या आरोपीला उत्तर प्रदेशमधून अटक केली. तर दुसऱ्या प्रकरणात रामनगर पोलिसांनी शुभम सरोजला बेड्या ठोकल्या आहेत. या दोन्ही प्रकरणातील पीडित मुली गरोदर राहिल्यानंतर या घटना समोर आल्या आहेत. पोलिस सध्या दोन्ही आरोपींची चौकशी करत आहेत. या घटनांमुळे डोंबिवलीत खळबळ उडाली असून मुलींच्या सुरक्षिततेचा प्रश्न ऐरणीवर आला आहे.

कल्याण रेल्वे स्थानकात १४ वर्षीय अल्पवयीन मुलीवर लैंगिक अत्याचार करण्यात आल्याची घटना उघडकीस आली. या प्रकरणी पोलिसांनी सौरभ सोनवणे या आरोपीला अटक केली. पीडित मुलगी अहिल्यानगरवरून आपल्या मामाला भेटण्यासाठी कल्याणला आली होती. ती कल्याणवरून मामाच्या घरी खोपोलीला जात होती. खोपोलीला जाण्यासाठी ती कल्याण रेल्वे स्थानकावर लोकलची वाट पाहत होती. आरोपीने तिच्या हातातील मोबाइल हिसकावून घेतला आणि तुला परत पाहिले असेल तर माझ्यासोबत पोलिस ठाण्यात चल असं आरोपी म्हणाला.

आरोपी पीडित मुलीला पोलिस ठाण्यात न घेऊन जाता तिला रेल्वे यार्डात घेऊन गेला. त्याठिकाणी आरोपीने पीडित मुलीवर बलात्कार केला. त्यानंतर आरोपीने पळ काढला. पीडित मुलीने कल्याण रेल्वे पोलिस ठाण्यात धाव घेत या प्रकरणी तक्रार दाखल केली. पोलिसांनी सीसीटीव्ही फूटेजच्या आधारे आरोपीचा शोध घेत त्याला अटक केली. आरोपीला कोर्टात हजर केले असताना त्याला २१ मे पर्यंत पोलिस कोठडी सुनावण्यात आली आहे.