Pune Ganeshotsav : 'डीजे'ला विसर्जन मिरवणुकीच्या दुसऱ्या दिवशीची परवानगी घेण्याची गरज नाही

गणेशोत्सव काही दिवसांवर येऊन ठेपला आहे. सर्वत्र गणरायाच्या आगमनासाठी लगबग सुरु झाली आहे. घरगुती गणपतींसह मंडळांकडूनही जय्यत तयारी सुरु आहे.या पार्श्वभूमीवर पुणे शहरात विसर्जन मिरवणुकीसाठी कडक नियोजन आखण्यात आलं असून, पोलिस आयुक्त अमितेश कुमार यांनी यासंदर्भात महत्वाचे निर्णय जाहीर केले आहेत. यावेळी त्यांनी टिळक रोडवरील मागील वर्षीच्या नियोजनातील त्रुटी मान्य करत यंदा अधिक काटेकोर नियोजन करण्याचा निर्धार व्यक्त केला.

काय म्हणाले पोलिस आयुक्त अमितेश कुमार ?

गणेशोत्सवाच्या पार्श्वभूमीवर खबरदारी म्हणून पुणे पोलीस आयुक्त अमितेश कुमार यांनी यासंदर्भात महत्वाचे निर्णय जाहीर केले आहेत. ते म्हणाले, " गणपती विसर्जन मिरवणुकीच्या दिवशी वापरण्यात येणाऱ्या डीजे सिस्टीमसाठी दुसऱ्या दिवशी वेगळी परवानगी घेण्याची आवश्यकता नाही. दहाव्या दिवशी मिळालेली परवानगी अकराव्या दिवशीसाठी वैध राहील यासंदर्भात लवकरच लिखित आदेश काढण्यात येतील. तसेच यंदाचा गणेशोत्सव पूर्णपणे निर्बंधमुक्त असणार आहे. मात्र, कार्यकर्त्यांनी स्वानुशासन पाळावे." असे आवाहन पुणे आयुक्तांनी केले आहे.

पुढे अमितेश कुमार म्हणाले," टिळक रोडवरील मिरवणूक रात्री १२ वाजेपर्यंत पूर्ण करण्याचा पोलिसांचा प्रयत्न असून, हे शक्य आहे की नाही हे माहीत नाही, पण नागरिकांचा पाठिंबा मिळाल्यास नक्कीच साध्य होईल. तसेच विसर्जन मिरवणुकीच्या दिवशी कोणताही व्यक्ती दारू विकत घेताना आढळल्यास संबंधित दुकानांवर कठोर कारवाई केली जाईल. आणि अशी कारवाई करु की त्या दुकानदाराच्या ७ पिढ्या विसरू शकणार नाहीत." असा कठोर इशाराही आयुक्तांनी दिला.

दरम्यान मिरवणुकीच्या दिवशी शाळांच्या आवारात वाहन पार्किंगची व्यवस्था करण्यावर विचार सुरु असून टिळक रोडवर एक स्वतंत्र स्वागत कक्षही उभारण्यात येणार असल्याचं पुणे पोलिस आयुक्त अमितेश कुमार म्हणाले आहेत. पुणे पोलिस दल हे सर्व गणेश भक्तांच्या पाठीशी ठामपणे उभं असून, शिस्त आणि सहकार्याच्या माध्यमातून यंदाचा गणेशोत्सव अधिक साजेसा आणि सुरक्षित करण्याचा निर्धार यावेळी पोलिस प्रशासनाने व्यक्त केला आहे.