ऐन महापालिका निवडणुकीत काँग्रेसने भाकरी फिरवली; राजकारणात दिला सर्वांनाच आश्चर्याचा धक्का

चंद्रपूर महापालिका निवडणुकीत काँग्रेसने आजवरच्या इतिहासात पहिल्यांदाच सगळेच उमेदवार नवीन दिले आहेत. एकही चेहरा पुन्हा दिलेला नाही. यातही नव्वद टक्के उमेदवार हे स्नातक किंवा त्यापेक्षा अधिक शिकलेले आहेत. काँग्रेसवर नेहमीच टीका केली जायची की, त्याचत्याच चेहऱ्यांना संधी दिली जाते. याचा अनेकदा फटकाही पक्षाला बसल्याचे दिसून आले.

तीन-तीन चार-चार टर्म नगरसेवक राहिलेल्या लोकांनाच उमेदवारी दिली जाणार असेल, तर नवे आणि सुशिक्षित चेहरे राजकारणात कसे येतील, असा प्रश्न उपस्थित केला जायचा. हा प्रश्न तसा सर्वच पक्षांना लागू होत असला तरी त्यात सुधारणा करण्याचे प्रयत्न आजवर फार कमी झाले. काँग्रेसने यावेळी पहिल्यांदाच आश्चर्यकारक भूमिका घेत सर्व जुने चेहरे बाजूला सारले. प्रसंगी विरोधही सहन करावा लागला. मात्र पक्षाच्या स्थानिक नेतृत्वाने या विरोधाला न जुमानता नव्या आणि युवा चेहऱ्यांना संधी दिली.

काँग्रेस इथे 63 जागा लढवत आहे. यातील तीन जागा सोडल्या तर इतर सर्व ठिकाणी सुशिक्षित आणि नवीन उमेदवार दिले. यामुळे राजकारणात येऊ पाहणाऱ्या सुशिक्षित युवकांना एक आशा देण्याचे काम पक्षाने केले, अशी प्रतिक्रिया हे उमेदवार देत आहेत. शिकलेल्या तरुणांना संधी देण्याची भूमिका स्थानिक पातळीवर घेण्यात आली असून त्यांना वाव देण्यासाठी हे पाऊल उचलण्यात आल्याचे खासदार प्रतिभा धानोरकर म्हणाल्या.

चंद्रपुरात वंचित बहुजन आघाडीची मोठी कारवाई

चंद्रपूर महानगरपालिका निवडणुकीत वंचित बहुजन आघाडीची ठाकरे गटासोबत युती झालेली आहे. या शहरातील प्रभाग क्र. 07- जटपुरा ही जागा ठाकरे गटाच्या उमेदवारासाठी वंचित बहुजन आघाडीने सोडली आहे. असे असताना वंचित बहुजन महिला आघाडी चंद्रपूर महानगर शहर महासचिव मोनाली पाटील यांनी पक्षाच्या विरोधात जाऊन बंडखोरी करीत शरद पवार गटाकडून उमेदवारी दाखल केलेली आहे.

मोनाली पाटील यांनी केलेली कृती पक्षाची शिस्तभंग करणारी आहे. यामुळे त्यांनी केलेल्या पक्ष विरोधी कारवाया बद्दल, त्यांना पदमुक्त करून त्यांची हकालपट्टी करण्यात आली आहे, असे वंचित बहुजन आघाडीने स्पष्ट केले.