ज्योतिष पीठाचे शंकराचार्य स्वामी अविमुक्तेश्वरानंद यांनी केदारनाथ धाममध्ये २२८ किलो सोन्याचा घोटाळा झाल्याचा आरोप केला आहे. सोमवारी शंकराचार्य स्वामी अविमुक्तेश्वरानंद उद्धव ठाकरे यांची भेट घेण्यासाठी मातोश्री येथे आले होते. ठाकरे यांची भेट घेल्यानंतर माध्यमांशी बोलताना त्यांनी ही माहिती दिली.
पत्रकारांनी त्यांना विचारलं होतं की, ''दिल्लीत केदारनाथ धामसारखे मंदिर बांधण्याची चर्चा आहे. यावर तुमचे काय मत आहे? यावर उत्तर देताना शंकराचार्य म्हणाले की, बारा ज्योतिर्लिंगांची व्याख्या आणि नियम आहेत. त्यामुळे केदारनाथ धाम कुठेही बांधता येणार नाही.''
शंकराचार्य म्हणाले, ''शास्त्रात बारा ज्योतिर्लिंगांचा उल्लेख आहे. केदारनाथ धाम दिल्लीत बनणार, हे म्हणणे चुकीचे आहे. आमच्या धार्मिक स्थळी राजकारणी घुसत आहेत. हे चुकीचे आहे. केदारनाथ धाममधून २२८ किलो सोन्याचा घोटाळा झाला आहे. याची चौकशी का होत नाही?''
शंकराचार्य म्हणाले की, 'केदारनाथमध्ये सोन्याचा घोटाळा झाला होता. हा मुद्दा का उपस्थित केला जात नाही? तिथल्या घोटाळ्यानंतर आता दिल्लीत केदारनाथ बांधणार? आता आणखी एक घोटाळा होणार आहे.' दरम्यान, गेल्या वर्षी केदारनाथ धामच्या एका पुजाऱ्याने १२५ कोटी रुपयांचा सोन्याचा घोटाळा झाल्याचा आरोप केला होता. हे सोने मंदिरात वापरण्यात येणार होते, मात्र त्याऐवजी पितळेचा वापर करण्यात आला होता, असा त्यांनी आरोप केला होता.
मात्र हे आरोप मंदिर समितीने फेटाळून लावले होते. आज पुन्हा शंकराचार्यांनी त्याच आरोपाची पुनरावृत्ती केली आहे. ते म्हणाले, ''केदारनाथमधून २२८ किलो सोने गायब आहे. चौकशी झाली नाही. त्याला जबाबदार कोण. आता ते दिल्लीतही केदारनाथ बांधणार असल्याचे सांगत आहेत.''
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.