Badlapur : वांगणीतील राजकीय संघर्ष चिघळला; शिंदे गटाचे सदस्याला बेड्या, उपसरपंच शेलार अद्यापही फरार

Badlapur Vangani Attack Accused Arrested : वांगणी ग्रामपंचायतीमधील दोन सदस्यांमधला वाद विकोपाला गेला आहे. त्यामुळे इथलं राजकारण चांगलंच तापलंय. उपसरपंच अमित शेलार यांच्या कार्यालयावर हल्ला केल्याप्रकरणी शिंदे गटाचे ग्रामपंचायत सदस्य रूपेश गवळी यांना पोलिसांनी अटक केलीय. मात्र रूपेश गवळी यांच्यावर झालेल्या हल्ला प्रकरणात अमित शेलार आरोपी असतानाही त्यांना अद्याप अटक का करण्यात आली नाही? असा सवाल आता उपस्थित होतोय.

या प्रकरणामुळे बदलापूर ग्रामीण पोलिसांच्या कार्यक्षमतेवरही प्रश्नचिन्ह उपस्थित होत आहे. विशेष म्हणजे गुन्हा दाखल झाल्यानंतरही आरोपी उपसरपंच अमित शेलार टीडीसीसी बँकेच्या निवडणूक प्रचारात भाजप पदाधिकाऱ्यांसोबत दिसून आले होते. त्यांची अटक टाळण्यासाठी भाजपच्या वरिष्ठांकडून पोलिसांवर दबाव आहे का? अशीही चर्चा आहे.

काही दिवसांपूर्वी अंतर्गत वादातून शिंदे गटाचे सदस्य रूपेश गवळी यांच्यावर हल्ला झाला होता. ही घटना सीसीटीव्ही कॅमेऱ्यात कैदही झाली होती. या हल्ल्याचा कट उपसरपंच अमित शेलार यांनी रचल्याचा आरोप करण्यात आला होता तसच त्यांच्याविरोधात गुन्हाही दाखल करण्यात आला होता. मात्र त्यानंतर काही दिवसांनीच अमित शेलार यांच्या कार्यालयाबाहेर काही गुंडांनी तोडफोड करत दहशत निर्माण करण्याचा प्रयत्न केला होता.

ही घटना देखील सीसीटीव्ही कॅमेऱ्यात कैद झाली होती. या प्रकरणात बदलापूर ग्रामीण पोलिसांनी सखोल चौकशी करत शिंदे गटाचे सदस्य रूपेश गवळी यांना कट रचल्याप्रकरणी अटक केलीय. त्यांच्यासोबत इतर तीन आरोपींनाही ताब्यात घेण्यात आलंय. मात्र रूपेश गवळी हल्ला प्रकरणात उपसरपंच अमित शेलार यांना का अटक झाली नाही? असा सवाल उपस्थित केला जात आहे. विशेष म्हणजे गुन्हा दाखल झाल्यानंतरही आरोपी अमित शेलार टीडीसीसी बँकेच्या निवडणूक प्रचारात तसच मतदानाच्या दिवशी दिसून आले. इतकच नाही तर निवडणूक जिंकल्यानंतर त्यांनी भाजप पदाधिकाऱ्यांसोबत जल्लोषही केला. त्यानंतरही अमित शेलार यांना अटक होत नसल्याने पोलिसांच्या भूमिकेवर प्रश्नचिन्ह उपस्थित होत आहे.