Amul Milk Rate : अमूल कंपनीने वाढवले दुधाचे दर, आता एक लिटरसाठी किती रुपये मोजावे लागणार? जाणून घ्या

महागाईच्या भडक्यात होरपळून निघालेल्या सर्वसामान्यांना आणखी एक मोठा झटका बसला आहे. जून महिन्याच्या सुरुवातीलाच दुधाच्या दरात वाढ झाली आहे. गुजरातच्या प्रसिद्ध अमूल कंपनीने दुधाचे दर प्रतिलीटर २ रुपयांनी वाढवले आहेत. आजपासून म्हणजेच सोमवारपासून ही दरवाढ करण्यात आली आहे.

अमूल कंपनीने अमूल गोल्ड, अमूल ताज आणि अमूल शक्ती या तिन्ही कंपन्यांच्या दूध दरात वाढ केली आहे. अमूल ताजाच्या छोट्या पिशव्यांच्या किमतीमध्ये कुठलाही बदल करण्यात आलेला नाही. म्हणजे छोट्या पिशव्यांमधील दूध आहे त्या किमतीमध्येच मिळणार आहे.

अमूलने दूधाच्या दरातील वाढ संपूर्ण देशभरात केली आहे. नवीन किमतींनुसार अमूल गोल्ड अर्धा लिटर दूध आता ३२ रुपयांवरून ३३ रुपयांना मिळणार आहे. तर, अमूल ताजा अर्धा लिटर दुधाचे दर २६ रुपयांवर २७ रुपये इतके झाले आहेत.

अमूल शक्ती ५०० मिली दूध आता ३० रुपयांना मिळणार आहे. तर १ लिटर दुधासाठी लोकांना आता ६६ रुपये द्यावे लागणार आहेत. याआधी दुधाचे दर ६४ रुपये इतके होते. या दूध दरवाढीचा परिणाम सर्वसामान्यांच्या बजेटवर होणार आहे.

दरम्यान, गुजरात मिल्क मार्केटिंग फेडरेशनने अमूल दूध दरात शेवटची वाढ ही फेब्रुवारी २०२३ मध्ये केली होती. शेतकऱ्यांना उत्पादनासाठी वाढलेला खर्च भरून निघावा यासाठी ही वाढ करण्यात आली होती. आता पुन्हा एकदा अमूल दूध दरात वाढ करण्यात आली आहे.