कार शिकताना भयंकर घडलं; ब्रेकच्या ऐवजी एक्सीलेटर दाबला, ट्रकला जोरदार धडक; ५ जणांचा मृत्यू

संजय राठोड, साम टिव्ही

यवतमाळ जिल्ह्यातील वणी घुग्गुस मार्गावर एक ह्रदयद्रावक अपघाताची घटना घडली. कार आणि ट्रकचा भीषण अपघात घडला. या भीषण धडकेत एकाच कुटुंबातील ५ जणांचा मृत्यू झाला. हा भीषण अपघात जन्नत सेलिब्रेशन हॉलपासून काही अंतरावर घडला. मुलीला कार शिकवताना हा दुर्देवी प्रसंग घडल्याची प्राथमिक माहिती समोर आली आहे.

मिळालेल्या माहितीनुसार, वणीतील लालपुलिया परिसरात राहणारे रियाज शेख हे व्यावसायिक ट्रक दुरूस्तीचे काम करीत होते. त्यांचे स्वत:चे गॅरेज होते. ते आपल्या मुलीला कार चालविण्याचं प्रशिक्षण देत होते. कार शिकवण्यासाठी ते आपल्या मुलीला घुग्गुस मार्गावर घेऊन गेले होते. दरम्यान, जन्नत हॉलजवळ मुलीचे कार चालवताना नियंत्रण सुटले. तिनं ब्रेकऐवजी एक्सीलेटर दाबलं.

कार थेट दुभाजकावरून उसळून महामार्गाच्या विरूद्ध दिशेनं गेली. तसेच समोरून येणाऱ्या ट्रकला धडकली. कारचा समोरील भाग अक्षरश: चक्काचूर झाला. या भीषण अपघातात कारमधील ४ मुलींचा मृत्यू झाला. तर, रियाज यांचा रूग्णालयात उपचारादरम्यान मृत्यू झाला. मृतांमध्ये रियाज यांच्या भावाच्या मुलाचाही समावेश आहे.

मिळालेल्या माहितीनुसार, मायरा शेख (वय वर्ष १७), अनिबा (वय वर्ष ११), झोया (वय वर्ष १३), लियाबा आणि रियाज (वय वर्ष ५४) अशी मृतकांची नावे आहेत.

मुलीला कार चालविताना काळाने घाला घातल्यानं वणी शहरात शोककळा पसरली आहे. या घटनेनंतर परिसरात हळहळ व्यक्त होत आहे. या घटनेनंतर काही काळ वाहतूक कोंडी झाली होती. पोलिसांनीही घटनास्थळी धाव घेतली. सध्या पोलिसांकडून अधिक तपास सुरू आहे.