भयंकर! अंगात कपडे नव्हते, हातात लाकडी दांडा; मनोरुग्णाच्या जीवघेण्या हल्ल्यात वृद्धाचा जागीच मृत्यू

वर्धा जिल्हाच्या आर्वी शहरातून धक्कादायक घटना उघडकीस आली आहे. एक मनोरुग्णाने लोकांवर जीवघेणा हल्ला केला. मनोरुगणाने केलेल्या हल्ल्यात एका वृद्धाचा जागीच मृत्यू झाला आहे. तर दोघे जण जखमी झाले आहेत.

मनोरुग्णाने केलेल्या हल्ल्यात वृद्धाचा मृत्यू झाल्याने नागरिकांमध्ये भीतीचं वातावरण पसरलं आहे. आर्वी शहरातील या घटनेने लोक घराबाहेर पडण्यासही घाबरत आहेत. स्थानिक नागरिकांनी मनोरुग्णावर कठोर कारवाईची मागणी केली आहे. आर्वी शहरातील इंदिरा भाजी मार्केटमध्ये संपूर्ण प्रकार घडला.

मिळालेल्या माहितीनुसार, आर्वी शहरातील इंदिरा भाजी मार्केटमध्ये मानसिक संतुलन ढासळलेल्या तरुणाने 70 वर्षीय वृद्धावर दाडंक्याने जीवघेणा हल्ला केला. मयुरेश लाडके असे २२ वर्षीय मनोरुग्णाचे नाव आहे. मनोरुग्ण मयुरेश हा बाजारात नग्नअवस्थेत उभा होता. त्याने लाकडी दांड्याने लोकांवर हल्ला केला. मयुरेशने केलेल्या हल्ल्यात दोन जण जखमी झाले. तर एकाचा जागीच जीव गेला.

बाजारात सकाळच्या सुमारास बाजारात विक्रेते आणि ग्राहकांची लगबग पाहायला मिळते. याच गर्दीच्या वेळी मनोरुग्ण मयुरेशने लोकांवर हल्ला केला. या हल्ल्यात संजय रामकृष्ण राऊत (वय 70) या वृद्ध शेतकऱ्याचा हल्यात मृत्यू झाला. त्यांच्या डोक्याच्या कवटीतून मेंदू बाहेर आल्याचं उपस्थितांनी सांगितलं.

मनोरुग्णाच्या कृत्याने नागरिकांकडून एकच संताप व्यक्त केला जात आहे. मयुरेशने केलेल्या हल्ल्यात रामराव महादेवराव वांगे (वय 85) आणि शहजाद या दोन शेतकऱ्यांवरही हल्ला केला. बेसावधपणे झालेल्या हल्ल्यात दोघेही गंभीर जखमी झाले आहेत. प्रसंगावधान राखत त्यांना तातडीने उपाचारासाठी रुग्णालयात दाखल करण्यात आलंय. सध्या यांची प्रकृती चिंताजनक असल्याचं म्हटलं जातय.

या सगळ्या प्रकरणामुळे परिसरात भीतीचं वातावरण निर्माण झालंय. दुकानदारांनी हा सगळा प्रकार घडल्यानंतर दुकाने बंद ठेवली. पोलिसांना या मनोरुग्णाला ताब्यात घेतलं असून नागरिकांच्या सुरक्षेचा प्रश्न ऐरणीवर आल्याची खंत व्यक्त केली जात आहे.