Wardha Crime : वर्धेत एकाच रात्री तीन घर टार्गेट; सोने चांदिच्या दागिनासह रोख केली लंपास, दोन दुचाकीही लांबविल्या

चेतन व्यास 
वर्धा : वर्धा शहराला लागून असलेल्या वरुड व आलोडी परिसरात चोरट्यानी रात्री दरम्यान चांगलाच धुमाकूळ घातला. वरुड येथे एका घरावर तर आलोडी परिसरात दोन घरांना चोरट्यानी टार्गेट केले. यात सोने- चांदीचे दागिने, रोख रकमेसह दोन दुचाकीसुद्धा लंपास केल्या. लंपास केलेल्या दोन दुचाकीपैकी एक इलेक्ट्रिक दुचाकी असल्याने तिची चार्जिंग संपली. यामुळे चोरट्यांनी तिला रस्त्यात सोडून पसार झाले. 

सेवाग्राम पोलीस स्टेशन अंतर्गत येणाऱ्या वरुड येथे प्रमिला जगताप या रात्री घराला कुलूप लावून घरा समोरील शेजारीच्या घरी झोपायला गेल्या होत्या. आज सकाळी त्या घरी परत आल्यावर त्यांना त्यांच्या घराचे कुलूप तुटलेले आढळून आले. सोबतच घरातील साहित्य अस्तव्यस्त होते व कपाट सुद्धा उघडले होते. जगताप यांनी तपासणी केली असता त्यांच्या घरातील नऊ तोळे सोन, काही चांदीचे साहित्य व ४० हजार रुपये चोरट्यानी लंपास केल्याचं निदर्शनास आले. 

आलोडी येथे दोन घरात चोरी 

तसेच आलोडी येथे सुद्धा प्रकाश अडसुळे व सुनीता देवरकर यांच्या बंद असलेल्या घरात सुद्धा चोरट्यानी हात साफ केला. देवरकर यांच्या घरातील एक दुचाकी, दोन ग्रॅम सोन व तीन हजार रुपये तर अडसूळ यांच्या घरातून चांदीचे साहित्य व एक इलेक्ट्रिक चार्जिंग दुचाकी चोरट्यांनी लंपास केली. सकाळी दोन्ही कुटुंब आल्यावर चोरी झाल्याच निदर्शनास आले. चोरट्यांनी तिन्ही बंद घरांना निशाणा बनवत चोरी केली.

चार्जिंग संपल्याने इलेक्ट्रिक बाईक सोडून पसार 
प्रकाश अडसुळे यांच्या घरातून चोरट्यानी एक इलेट्रिक दुचाकी लंपास केली होती. मात्र त्या दुचाकीची चार्जिंग संपल्याने ते वाहन रस्त्यात चोरट्यानी सोडले. इलेक्ट्रिक दुचाकीत जिपीएस असल्याने तिचा लोकेशन पाहत पोलिसांनी दुचाकी नागपूर जिल्ह्याच्या असोला गावाजवळून ताब्यात घेतली. यावरून चोरटे हे नागपूरला महामार्गाने पसार झाल्याचा अंदाज पोलिसांनी वर्तवला असून त्या दृष्टीने तपास सूरू आहे.