कोल्हापूरमध्ये रात्री दंगल; जाळपोळ, दगडफेक अन् गाड्यांची तोडफोड

Kolhapur latest update on two group clash : कोल्हापूरमध्ये सिद्धार्थनंगरमध्ये दोन समाजात तेढ निर्माण झाली असून शुक्रवारी रात्री दंगलीत रूपांतर झाले. दोन गटात तुफान दगडफेक, जाळपोळ अन् गाड्यांची तोडफोड झाल्याची घटना घडली आहे. कोल्हापुरातल्या सिद्धार्थ नगर कमानीजवळ दोन गटात तुफान दगडफेक झाली. चार चाकी आणि दुचाकी वाहनांचे नुकसान करण्यात आलं. काही वाहने पेटवून देण्यात आली. सिद्धार्थ नगर परिसरात मोठा पोलीस बंदोबस्त तैणात करण्यात आला आहे. एकमेकांवर दगडफेक करणाऱ्यांना पोलिसांनी ताब्यात घेतलं आहे. या दगडफेकीचे कारण अद्यापही अस्पष्ट आहे.

कोल्हापुरातील सिद्धार्थ नगर परिसरात असणाऱ्या चौकातील कमानी जवळ शुक्रवारी रात्री दोन गटांमध्ये तुंबळ हाणामारी आणि दगडफेकीची घटना घडली आहे. सिद्धार्थ नगर कमानीजवळ असणाऱ्या चौकात सिद्धार्थ नगर आणि राजेबागस्वार येथील दोन गटांमध्ये अनेक दिवस वाद आहे. राजेबागस्वार फुटबॉल क्लबच्या 31 व्या वर्धापनदिना निमित्त फलक आणि साऊंड सिस्टिम लावण्यात आले होते. यावरून दुपारपासूनच तणाव निर्माण झाला होता. तसेच या चौकात वर्चस्व कुणाचं यावर देखील अनेक वर्ष इथल्या तरुणांमध्ये वाद आहे.

शुक्रवारी सायंकाळी हा वाद उफाळून आला. दोन्ही गटातील नागरिकांनी एकमेकांवर तुंबळ दगडफेक करण्यास सुरुवात केली. यावेळी संतपलेल्या काही तरुणांनी या परिसरातल्या चार चाकी आणि दुचाकी वाहनांची तोडफोड केली. तर काहींनी वाहने पेटवून देण्याचा प्रयत्न केला. दोन्ही बाजूंनी मोठ्या प्रमाणात दगडफेक होत असल्याने कोल्हापूर पोलिसांनी मोठ्या प्रमाणात कुमक मागून जमावावर नियंत्रण आणलं. दोन्ही बाजूंनी जोरदार घोषणाबाजी होत असल्याने हा वाद अधिक तीव्र होऊ नये यासाठी पोलिसांनी दोन्ही जमावला पांगवलं. तर काहींना ताब्यातही घेतलं आहे. हा नेमका वाद कशावरून झाला याबद्दल पोलिसांनी अधिकृतरित्या माहिती दिली नाही. ज्या बॅनर वरून हा वाद उफाळून आला ते बॅनर पोलिसांनी उतरवले आहेत. सध्या सिद्धार्थ नगर परिसरात तणावपूर्ण शांतता निर्माण झाली आहे.