Madhubhai Kulkarni : PM मोदींना राजकारणात आणणारे मधुभाई कुलकर्णी यांचं निधन; छत्रपती संभाजीनगरात घेतला अखेरचा श्वास

छत्रपती संभाजीनगर : राष्ट्रीय स्वयंसेवक संघाचे ज्येष्ठ प्रचारक मधुभाई कुलकर्णी यांचं गुरुवारी 18 सप्टेंबर रोजी दुपारी 12.30 वाजता वृद्धपकाळामुळे छत्रपती संभाजीनगर येथे निधन झालं. मधुभाई कुलकर्णी हे मृत्यूसमयी 88 वर्षांचे होते. पंतप्रधान नरेंद्र मोदी यांना राजकीय क्षेत्रात आणण्यात मधुभाई कुलकर्णी यांचा सिंहाचा वाटा होता.

मधुभाई कुलकर्णी यांचा जन्म 17 मे 1938 रोजी कोल्हापुरात झाला होता. मधुभाईंचं शालेय शिक्षण चिकोडी येथे झालं होतं. चिकोडी येथे वास्तव्यास असताना संघाच्या शाखेत जाण्याची ओढ लागली. ते संघाच्या स्थापनेपासून आजतागायत सुरू असलेल्या शतकी वाटचालीचे साक्षीदार होते. कोल्हापुरातून 1954 मध्ये इयत्ता दहावीची परीक्षा उत्तीर्ण झाले. त्यानंतर मधूभाई महाविद्यालयीन शिक्षणासाठी मुंबईला गेले. त्यांनी बीए आणि बीएड्चे शिक्षण घेतलं. त्यांनी काही काळ सेल्स टॅक्स विभागात नोकरी केली. पुढे त्यांनी संघाचे प्रचारक म्हणून काम करण्याचा निर्णय घेतला.

महाराष्ट्राच्या जळगावात प्रचारक म्हणून 1962 साली कार्य सुरु केलं. त्यानंतर छत्रपती संभाजीनगरात जिल्हा प्रचारक, सोलापूरचे विभाग प्रचारक, पुण्याचे महानगर प्रचारक म्हणून त्यांच्याकडे दायित्व होतं. 1984 ते 1996 या कालखंडात ते गुजरातचे प्रांत प्रचारक होतं. 1996 ते 2003 या काळात त्यांनी पश्चिम क्षेत्राचं प्रचारक म्हणून काम केलं.

2003 ते 2009 या काळात ते संघाचे अखिल भारतीय बौद्धिक प्रमुख होते. या काळात त्यांचे वास्तव्य तत्कालीन आंध्रप्रदेशच्या हैदराबाद येथे होते. वयोमानामुळे 2015 पासून ते दायित्वमुक्त होऊन छत्रपती संभाजीनगर येथे वास्तव्याला होते. अलिकडे प्रकृती अस्वास्थ्यामुळे त्यांना रुग्णालयात दाखल करण्यात आलं होते.

सरसंघचालक मोहन भागवत यांनी 2 आठवड्यापूर्वीच त्यांची प्रत्यक्ष भेट घेत प्रकृतीची चौकशी केली होती. परंतु, आज, गुरुवारी त्यांची प्राणज्योत मालवली. दरम्यान, मधूभाईंचे पार्थिव अंत्यदर्शनासाठी समर्पण कार्यालय, छत्रपती संभाजीनगर येथे ठेवण्यात आले आहे. त्यांनी देहदान केले आहे. त्यांचे पार्थिव रामचंद्र इन्स्टिट्यूट ऑफ मेडिकल सायन्सेस, आर के दमाणी मेडिकल कॉलेज येथे सोपविले जाणार आहे