दारुच्या नशेत मुलासह पाण्यात उतरले, पण तिथेच काळाने गाठले, बापासह निष्पाप चिमुकल्याचाही गेला जीव

यवतमाळ जिल्ह्यातील घाटंजी तालुक्यात एक अतिशय ह्रदयद्रावक घटना समोर आली आहे. घोटी येथे बाप-लेकाचा विहिरीत बुडून दुर्दैवी मृत्यू झाल्याने संपूर्ण परिसरात हळहळ व्यक्त होत आहे. मिळालेल्या माहितीनुसार, सचिन जाधव (वय 40) आणि त्यांचा 9 वर्षीय मुलगा विहान जाधव हे दोघे विहिरीत बुडाल्याने मृत्यूमुखी पडले. या घटनेमुळे गावात शोककळा पसरली आहे.

स्थानिकांनी दिलेल्या महितीनुसार, सचिन जाधव यांना दारूचे व्यसन होते. दारूच्या नशेत त्यांनी आपल्या मुलासोबत विहिरीत पोहण्यासाठी उतरल्यानंतर पाण्याचा अंदाज न आल्याने ही दुर्घटना घडल्याची शक्यता व्यक्त केली जात आहे. तसेच सचिन जाधव यांना पोहता येत नसल्याची माहिती नातेवाईकांनी पोलिसांना दिली आहे. या घटनेची माहिती मिळताच पारवा पोलीस घटनास्थळी दाखल झाले असून संपूर्ण गावावर शोककळा पसरली आहे.

तर वर्धा जिल्ह्यातील समुद्रपूर तालुक्यात एक अत्यंत दुर्दैवी घटना घडली असून नदीत बुडून तिघांचा मृत्यू झाला आहे. या घटनेमुळे संपूर्ण परिसरात शोककळा पसरली आहे. समुद्रपूर तालुक्यातील शेडगाव शिवारात ही घटना घडली. अधिकमासानिमित्त आंघोळीसाठी गेलेल्या वडील, मुलगी आणि तिच्या मैत्रिणीचा नदीच्या पाण्यात बुडून मृत्यू झाला. अतुल किनकर (वय 45), त्यांची मुलगी रिधीमा किनकर (वय 15) आणि तिची मैत्रीण गुंजन मसराम (वय 15) अशी मृतांची नावे आहेत. तिन्ही जण शेडगाव येथील रहिवासी होते.

मिळालेल्या माहितीनुसार, आंघोळ करत असताना पाण्याचा अंदाज न आल्याने ही दुर्घटना घडली. घटनेची माहिती मिळताच परिसरातील नागरिकांनी घटनास्थळी मोठी गर्दी केली. पोलिसांनी स्थानिक नागरिकांच्या मदतीने तिन्ही मृतदेह नदीतून बाहेर काढले. या दुर्दैवी घटनेमुळे शेडगाव गावासह संपूर्ण परिसरात हळहळ व्यक्त केली जात आहे. तीन जणांच्या अकाली मृत्यूने गावावर शोककळा पसरली आहे.