Pune Accident: पुण्यात अपघाताचा थरार! भरधाव कार पुलावरून खाली कोसळली, वाहनाचा चुराडा

• पुण्यात भरधाव कार पुलावरून कोसळली

• दारूच्या नशेत तरुणाने भरधाव कार चालवली

• गरवारे पुलावरून कार खाली कोसळली

• अपघातामध्ये तरुण गंभीर जखमी

अक्षय बडवे, पुणे

पुण्यामध्ये भयंकर रस्ते अपघाताची घटना घडली. दारूच्या नशेत तरुणाने कार चालवली. ही भरधाव कार गरवारे पुलावरून खाली कोसळली. या अपघातामध्ये चालक गंभीर जखमी झाला. तर कारमधील इतर कुणालाही दुखापत झाली नाही. हा अपघात मध्यरात्रीच्या सुमारास घडल्यामुळे मोठी जिवीतहानी टळली. या अपघाताप्रकरणी कारचालकाविरोधात गुन्हा दाखल करण्यात आला आहे. पोलिस तपास करत आहेत.

मिळालेल्या माहितीनुसार, पुण्यात 'ड्रिंक अँड ड्राईव्ह'चा थरार पाहायला मिळाला. १९ वर्षीय तरुणाने बेदरकारपणे कार चालवली. वेगात असल्याने कार गरवारे पुलावरून खाली कोसळली. दारूच्या नशेत असलेल्या तरुणाने पुलावरील रेलिंग तोडले. या अपघातामध्ये कारच्या पुढील भागाचा चुराडा झाला. या प्रकरणी पुण्यातील डेक्कन पोलिस ठाण्यात गुन्हा दाखल करण्यात आला आहे. अथर्व अमित जैन (१९ वर्षे) असे कारचालक तरुणाचे नाव असून त्याच्याविरोधात गुन्हा दाखल करण्यात आला आहे.

पोलिसांनी सांगितले की, ही घटना २५ मे रोजी मध्यरात्री १.३० वाजताच्या सुमारास पुण्यातील छत्रपती संभाजी महाराजांच्या पुतळ्याजवळ घडली. संबंधित आरोपी तरुण हा जंगली महाराज रस्त्याचे डेक्कन जिमखाना येथे जात होता. रात्रीची वेळ असल्याने जंगली महाराज रस्त्याने जाताना आरोपी कार बेदरकारपणे चालवत होता. डेक्कन जिमखानाजवळ असलेल्या गरवारे पुलावरून गुडलक चौकाकडे जात असताना कारला अपघात झाला. चालक दारूच्या नशेत असल्याने वाहनावर नियंत्रण मिळवता आले नाही आणि त्याने त्याचे वाहन या पुलावर असलेल्या रेलिंगवर धडकवले.

कारचा वेग जास्त असल्याने कार पुलावरील रेलिंग तोडून पलीकडच्या बाजूला जाऊन कोसळली. अपघात होताच रात्रीची वेळ जरी असली तरी रहदारीचा भाग असल्यामुळे स्थानिकांची आणि इतर वाहन चालकांची सुद्धा मोठी गर्दी झाली. सुदैवाने या घटनेत चालक वगळता कोणीही जखमी झाले नाही. घटनेची माहिती मिळताच डेक्कन पोलिस ठाण्यातील कर्मचाऱ्यांनी घटनास्थळी धाव घेतली. पोलिसांनी जखमी कारचालकाला रुग्णालयात दाखल केले. त्याच्याविरोधात गुन्हा दाखल करण्यात आला आहे. संबंधित आरोपीला पोलिसांकडून नोटीस बजावण्यात आली असून पुढील तपास सुरू आहे.