Pune : पुण्यातील संतापजनक घटना; बस स्टँडवर तरूणीसमोर हस्तमैथून, पोलिसांनी ४८ तासांत नराधमाच्या मुसक्या आवळल्या

गोपाल मोटघरे, पिंपरी चिंचवड प्रतिनिधी, साम टीव्ही मराठी

पिंपरी-चिंचवड शहरातील सेंट मदर तेरेसा उड्डाणपुलावर तरुणीसमोर अश्लील कृत्य करणाऱ्या माथेफिरू तरुणाला पिंपरी पोलिसांनी अवघ्या ४८ तासांच्या आत बेड्या ठोकल्या आहेत. पोलिसांच्या या कामगिरीचे सर्वत्र कौतुक होत आहे.

तरुणीसमोर अश्लील कृत्य केल्यानंतर स्वतःची ओळख लपवण्यासाठी या माथेफिरू तरुणाने आपले कपडे बदलले होते. या प्रकरणात कोणताही ठोस पुरावा नसताना पोलिसांनी अत्यंत चाणाक्षपणे तपास केला. पोलिसांनी परिसरातील जवळपास ६० ते ७० सीसीटीव्ही (CCTV) कॅमेऱ्यांचे फुटेज तपासले. अखेर आरोपीच्या शूज आणि टी-शर्टच्या रंगावरून त्याचा माग काढत पोलिसांनी त्याला वाल्हेकरवाडी येथील चिंचवडेनगर येथून ताब्यात घेतले.

झाकीर शेख (वय ४३ वर्षे) असे अटक करण्यात आलेल्या आरोपीचे नाव आहे. आरोपी हा एका मॉलमध्ये बाऊन्सर म्हणून काम करत असून, त्यानेच हे लज्जास्पद कृत्य केल्याचे पोलीस तपासात उघड झाले आहे. या प्रकरणात पिंपरी पोलिसांनी अत्यंत तत्परतेने कायदेशीर कारवाई करत आरोपीच्या मुसक्या आवळल्या आहेत.