मराठवाड्यात शिवसेना ठाकरे गटाला जोरदार झटका; माजी आमदारानं चार दशकांची साथ सोडली

आगामी स्थानिक स्वराज्य संस्थांच्या निवडणुकांच्या पार्श्वभूमीवर जालन्यात शिवसेना ठाकरे गटाला मोठा धक्का बसला आहे. शिवसेनेचे माजी आमदार शिवाजीराव चोथे यांनी पक्षाला जय महाराष्ट्र केलं आहे. त्यांनी पक्षाच्या प्राथमिक सदस्यत्वाचा राजीनामा पक्षप्रमुख उद्धव ठाकरे यांना पाठवला आहे. त्यांनी राजीनामा देत जवळपास ४० वर्षांचा शिवसेनेचा प्रवास संपवला आहे. शिवाजीराव यांनी दिलेल्या राजीनाम्यानंतर ठाकरे सेनेला धक्का बसला असल्याचं बोललं जात आहे.

चोथे यांनी जवळपास ४० वर्ष शिवसेनेची साथ दिली. चाळीस वर्षांपूर्वी त्यांनी शिवसेनेत प्रवेश केला होता. प्रवेश केल्यानंतर त्यांची जिल्हाप्रमुख म्हणून नियुक्ती झाली होती. जिल्हाप्रमुख हे पद त्यांनी जवळपास पंचवीस वर्षे सांभाळलं. त्यानंतर त्यांनी अंबड विधानसभा मतदारसंघातून १९९५ साली निवडणूक लढवली. चोथे निवडूनही आले होते. त्यानंतर १९९९ आणि २००४ साली त्यांना शिवसेनेची उमेदवारी देण्यात आली होती.

परंतु शिवाजीराव यांना पराभवाचा सामना करावा लागला. त्यानंतर त्यांनी घनसावंगी विधानसभा मतदारसंघातून अपक्ष निवडणूक लढवली होती. परंतु अपक्ष निवडणूक लढवूनही त्यांना हवं तसं यश मिळालं नाही. पराभव झाल्यानंतर ते तांत्रिकदृष्ट्या शिवसेना उद्धव ठाकरे गटात जिल्हा सहसंपर्क प्रमुख पदावर होते, अशी समर्थकांकडून सांगितली जातआहे.

पण सध्या त्यांनी वैयक्तीक कारणांमुळे शिवसेना ठाकरे गटाला जय महाराष्ट्र करत असल्याचा निर्णय घेतला. त्यांनी उद्धव बाळासाहेब ठाकरे यांना पत्राद्वारे राजीनामा दिला. त्यांनी पत्रात म्हटलं की, 'दिवंगत शिवसेनाप्रमुख बाळासाहेब ठाकरे आणि आपले प्रेम गेली चाळीस वर्षे विविध पदांवर काम करताना लाभले आहे'.

'पक्षाच्या प्राथमिक सदस्यत्वाचा राजीनामा दिला असला तरी, माझ्या ह्रदयात बाळासाहेब ठाकरे, आपण आणि मातोश्रीबाबत कायम शेवटच्या श्वासापर्यंत प्रेमाची भावना राहिल', असे चोथे यांनी ठाकरेंना लिहिलेल्या पत्रात म्हटलंय. 'शिवसेनेच्या प्राथमिक सदस्यत्वाचा राजीनामा दिला आहे. या व्यतिरिक्त आपण सध्या कोणतेही राजकीय वक्तव्य करणार नाही', असं शिवाजीराव चोथे म्हणाले आहेत. दरम्यान, शिवसेना ठाकरे गटाची साथ सोडल्यानंतर ते कोणत्या पक्षात प्रवेश करतील? हे पाहणं महत्वाचं ठरेल.