Shirdi Politics : ४ वर्षांपासून प्रचार, ऐनवेळी नगराध्यक्षपदाचे आरक्षण SCसाठी जाहीर; साईबाबांच्या शिर्डीत दिग्गजांचा हिरमोड

सचिन बनसोडे, साम टीव्ही

शिर्डी नगरपरिषदेचे अध्यक्षपद अनुसूचित जातींच्या महिलेसाठी आरक्षित झालं आहे. यामुळे गुडघ्याला बाशिंग बांधून बसलेल्या खुल्या प्रवर्गातील अनेक इच्छुकांचा हिरमोड झालाय. इच्छुकांनी गेल्या चार वर्षांपासून सार्वजनिक कार्यक्रमांच्या माध्यमातून आपले कॅम्पेनिंग केले होते. मात्र आरक्षण जाहीर होताच शिर्डीतील दिग्गजांना मोठा धक्का बसलाय. काहींनी जाहीररित्या तर काहींनी बॅनरच्या माध्यमातून आपल्या भावना व्यक्त केल्याने शिर्डीत कही खुशी कही गम असे चित्र आहे.

कोटी भाविकांचे श्रद्धास्थान असलेली साईबाबांची शिर्डी.. राज्यातील दिग्गज मंत्री राधाकृष्ण विखे पाटील यांचा मतदारसंघ असलेली शिर्डी.. याच शिर्डीच्या राजकारणात दबदबा ठेवण्यासाठी अनेक स्थानिक नेते ताकद लावत असतात. स्थानिक स्वराज्य संस्थांच्या निवडणुका लांबल्याने शिर्डीच्या नगराध्यक्ष पदाची स्वप्ने बाळगून अनेक दिग्गजांनी गेल्या ४ वर्षांपासून विविध माध्यमातून आपली दावेदारी सिद्ध करण्याचा प्रयत्न केला. मात्र शिर्डी नगराध्यक्षपदाचे आरक्षण अनुसूचित जाती महिलेसाठी जाहीर होताच शिर्डीतील स्थानिक नेत्यांच्या स्वप्नांवर पाणी फिरले आहे. काहींनी विखे पाटील सांगतील, त्याप्रमाणे पुढील दिशा ठरवू असे म्हटले आहे, तर काहींनी बॅनरबाजी करून आपल्या भावना व्यक्त केल्या आहेत.

नगराध्यक्षपद अनुसूचित जातीसाठी आरक्षित झाले ही साईबाबांची इच्छा असून शिर्डीत महायुतीचीच सत्ता येणार असल्याचा विश्वास माजी खासदार सुजय विखे यांनी व्यक्त केलाय. शिर्डीत खुल्या प्रवर्गातील दिग्गजांच्या स्वप्नांवर पाणी फिरले असले, तरी राजकीय वातावरण चांगलेच तापलं आहे. आपल्या गोटातील अनुसूचित जातीच्या उमेदवाराला नगराध्यक्षपदी बसवण्यासाठी आगामी काळात पडद्यामागे राजकीय डावपेच बघायला मिळणार आहे. त्यामुळे शिर्डी नगराध्यक्षपदाची निवडणूक लक्षवेधी ठरण्याची शक्यता आहे.

१६ नगरपरिषदांवर SC महिलांसाठी आरक्षण

राज्यात २४७ नगरपालिका आणि १४७ नगरपंचायतीमधील नगराध्यक्षपदाचे आरक्षण जाहीर झालंय. यामध्ये ३३ नगरपरिषदांपैकी १६ नगरपरिषदांमध्ये अनुसूचित जातीच्या महिलांना आरक्षण जाहीर झालंय. मोहोळ, ओझर, भुसावळ, शिर्डी, दिग्रस, अकलूज आणि बीड नगरपरिषदेत अनुसूचित जातीच्या महिलांसाठी आरक्षण जाहीर झालं आहे.