Explainer : सोन्याचा भाव 1,21000 रुपयांवर पोहोचला, काय आहे तेजीचं कारण? जाणून घ्या

सोन्याचा दरात दिवसेंदिवस तेजी पाहायला मिळत आहे. सोन्याचा दर प्रतितोळा १ लाख २१ हजार रुपयांपर्यंत पोहोचला आहे. सोन्याच्या दराने आतापर्यंतची उच्चांकी गाठली आहे. सलग सहाव्या दिवशी सोन्याच्या दरात वाढ होताना दिसत आहे. सोन्याच्या दरात नेमकी वाढ का होत आहे, जाणून घेऊयात.

अमेरिकेच्या धोरणामुळे भारतात सोन्याच्या दरावर परिणाम झाला आहे. अमेरिकेतील शटडाऊनमुळे डॉलरच्या भावात घसरण होत आहे. तसेच या शटडाऊनमुळे अमेरिकेतील सरकारी सेवेवरही परिणाम होत आहे. जागतिक पातळीवर महागाई आणि मंदीची देखील भीती व्यक्त करण्यात येत आहे. यामुळे सोन्याच्या दरात वाढ झाल्याचे दिसून येत आहे.

अमेरिकेने टॅरिफ आणि परदेशी धोरणात बदल केल्याने सोन्याच्या दरात मोठी वाढ झाली आहे. काही देशात राजकीय अस्थिरता निर्माण झाल्यानेही सोन्याच्या दरात वाढ झाल्याचं सांगण्यात येत आहे. सोन्याच्या वाढत्या मागणीमुळे सणासुदीत मोठ्या प्रमाणात दागिन्यांची खरेदी केली जाऊ शकते.

अमेरिकी डॉलर इंडेक्स यावर्षी ९.५१ टक्क्यांपर्यंत घसरला आहे. २०१७ सालानंतर अमेरिकी चलनात मोठी घसरण पाहायला मिळत आहे. यंदा तीन वर्षांची उच्चांकी पातळी ११०.१८ वर पोहोचलेला हा इंडेक्स आज मंगळवारी ९८.२० वर पोहोचलाय. दुसऱ्या बाजूला एमसीएक्सवर सोन्याचा भावात यावर्षी ५० टक्क्यांहून अधिक वाढ झाली आहे. एमसीएक्सवर सोन्याचा दर १० ग्रॅम १२०,९०० रुपयांपर्यंत पोहोचला आहे.

जगातील आर्थिक अस्थिरता, डॉलरमधील घसरण, सणासुदीच्या काळात गुंतवणूकदारांचा सोन्यावरील विश्वासामुळे सोन्याचे दर गगनाला भिडले आहेत . त्यामुळे येत्या काळात सोन्याची तेजी सुरुच राहणार की नाही, हे पाहणं महत्वाचं ठरणार आहे.