'१ वाजता आली, चेहऱ्यावर चिंता अन्..' 'त्या' रात्री डॉक्टर तरूणीसोबत काय घडलं? हॉटेल मालकानं सर्वच सांगितलं

ओंकार कदम, साम प्रतिनिधी

साताऱ्यातील फलटण येथील डॉक्टर तरूणीनं आयुष्य संपवलं. या घटनेनंतर परिसरात खळबळ उडाली. या प्रकरणी आरोपी पोलीस उपनिरीक्षक गोपाळ बदने आणि प्रशांत बनकर सध्या अटकेत. पोलीस तपासात अनेक बाबी उलगडत आहे. अशातच डॉक्टर तरूणी मृत्यूपूर्वी ज्या हॉटेलमध्ये गेली होती, त्या हॉटेलचा सीसीटीव्ही फुटेज समोर आला आहे. तसेच हॉटेल मालकानेही घटनेच्या दिवशी नेमकं काय घडलं? डॉक्टर तरूणीनं हॉटेलमध्ये गेल्यावर नेमकं काय केलं? याबाबतची माहिती दिली.

घटनेच्या दिवशी डॉक्टर तरूणी फलटण येथील नामांकित हॉटेलमध्ये गेली होती. रात्री १ वाजता हॉटेलमध्ये गेल्याची माहिती आहे. 'रात्री १ वाजता डॉक्टर तरूणी आली होती. बारामतीला निघायचं आहे. एवढ्या रात्रीचं प्रवास करणं योग्य नाही. त्यामुळे मला रूम पाहिजे, असं तिनं सांगितलं. माणुसकी म्हणून तिला रूम नंबर ११४ देण्यात आले. लॉजिंग आणि बोर्डिंगच्या ॲक्टप्रमाणे रजिस्टरला एन्ट्री करून आधार कार्ड नंबर घेऊन देण्यात आले, अशी माहिती हॉटेल मालकाने दिली'.

'दुसऱ्या दिवशी दुपारी बारा ते एकच्या सुमारास कर्मचाऱ्यांनी बेल वाजवली. परंतु कुणीही दार उघडले नाही. पुन्हा तीन ते चारच्या दरम्यान बेल वाजवण्यात आली. कुणीही दार उघडत नसल्यामुळे कर्मचाऱ्यांना संशय आला. माझ्या ऑफिसची चावी मी लगेच पुण्यातून फलटणला पाठवून दिली. साधारण सहा वाजल्यानंतर ती रूम उघडण्यात आली', अशी माहिती हॉटेल मालकाने दिली.

'तेव्हा डॉक्टर तरूणीनं गळफास लावून आत्महत्या केली असल्याचं निदर्शनाल आले. नंतर तातडीने पोलिसांना बोलावण्यात आले. पोलिसांनी तपास करून मृतदेह ताब्यात घेऊन, पुढची सर्व प्रक्रिया पार पाडली', अशीही माहिती हॉटेल मालकाने दिली. 'हॉटेलमध्ये आल्यानंतर स्टाफच्या म्हणण्यानुसार, त्या महिलेचा चेहरा पडलेला दिसत होता. ती डॉक्टर तरूणी चिंतेत असल्याचं पाहायला मिळालं', असंही हॉटेल मालकानं सांगितलं.