Shocking : संतापजनक! ST महामंडळाच्या अधिकाऱ्याकडून कर्मचारी महिलेचा विनयभंग; शरीरसुखाचीही केली मागणी

विजय पाटील, सांगली

Sangali Crime News सांगलीतून धक्कादायक बातमी समोर आली आहे. महाराष्ट्र राज्य मार्ग परिवहन महामंडळाच्या (एसटी) एका कर्मचाऱ्याने महिलेचा विनयभंग केल्याचा संतापजनक प्रकार घडला आहे. याप्रकरणी वरिष्ठ लिपिकाविरोधात गुन्हा दाखल करण्यात आला आहे.विनायक कदम (Vinayak Kadam ) असं आरोपीचं नाव आहे. या घटनेमुळे सांगली आगारात मोठी खळबळ उडाली असून संबंधित प्रकरणाची शहर पोलीस ठाण्यात तक्रार करण्यात आली आहे.

मिळालेल्या माहितीनुसार, विनायक कदम हा सांगली आगारात वरिष्ठ लिपिक म्हणून काम पाहत होता. त्याच ठिकाणी कार्यरत असलेल्या एका महिला कर्मचाऱ्यावर त्याची घाणेरडी नजर होती. गेल्या दोन वर्षांपासून विनायक कदम हा महिलेचा मानसिक आणि शारीरिक छळ करत होता. संबंधित महिला कर्मचाऱ्याने याबाबत वेळोवेळी वरिष्ठ अधिकाऱ्यांकडे तक्रार केली होती. मात्र, तिच्या तक्रारीची गांभीर्याने दखल घेतली गेली नसल्याचा आरोप करण्यात आला आहे.

महिलेच्या म्हणण्यानुसार, विनायक कदम याच्याकडून वारंवार अयोग्य वर्तन केले जात होते. तसेच त्याने शरीरसुखाची मागणी केल्याचा गंभीर आरोपही पीडित महिलेने केला आहे. सातत्याने होणाऱ्या या त्रासामुळे महिला मानसिक तणावाखाली होती. अखेर तिने हा प्रकार आपल्या नातेवाईकांना सांगितला. घटनेची माहिती मिळताच संतप्त झालेल्या नातेवाईकांनी सांगली आगारात धाव घेतली. विनायक कदम याला जाब विचारला. यावेळी वाद वाढत गेला आणि संतप्त नातेवाईकांनी त्याला मारहाण केल्याची घटना घडली.

या प्रकारामुळे काही काळ आगार परिसरात तणावाचे वातावरण निर्माण झाले होते. दरम्यान, पीडित महिलेच्या तक्रारीवरून सांगली शहर पोलीस ठाण्यात विनायक कदम याच्याविरुद्ध विनयभंगाचा गुन्हा दाखल करण्यात आला आहे. तसेच कार्यालयात घुसून मारहाण केल्याप्रकरणी महिलेच्या नातेवाईकांविरोधातही अदखलपात्र गुन्ह्याची नोंद करण्यात आली आहे. या संपूर्ण प्रकरणाची पोलीसांकडून चौकशी सुरू असून दोन्ही बाजूंचे जबाब नोंदवण्याचे काम सुरू आहे. दरम्यान कामाच्या ठिकाणी महिलांच्या सुरक्षिततेचा प्रश्न पुन्हा एकदा ऐरणीवर आला आहे.