Weather Update : पुढील ४८ तासांत केरळमध्ये मान्सून, महाराष्ट्रात वादळी पाऊस, 'या' जिल्ह्यांना अलर्ट; वाचा हवामानाचा अंदाज

Maharashtra Today Weather Update News महाराष्ट्रात उकाडा काहीसा कमी झाला असून पुढील काही दिवस जोरदार वाऱ्यासह आणि विजांच्या कडकडाटासह राज्यभरात मान्सूनपूर्व वादळी पावसाची शक्यता वर्तवण्यात आली आहे. मान्सूनपूर्व पडणाऱ्या पावसामुळे नागरिकांना उकाड्यापासून काही प्रमाणावर दिलासा मिळणार आहे. दरम्यान मान्सून केरळच्या उंबरठ्यावर असून पुढील २ दिवसांत त्याचं आगमन होणार आहे. आज मध्य महाराष्ट्र, मराठवाडाच्या जिल्ह्यांमध्ये वादळी पाऊस आणि तुरळक गारपिटीची शक्यता आहे. तर उर्वरित राज्यात वादळी पावसाचा अंदाज असल्याने येलो अलर्ट हवामान विभागाने दिला आहे. दरम्यान आता शेतकरी राजा मान्सूनच्या प्रतीक्षेत आहे.

हवामान विभागाने आज मध्य महाराष्ट्रातील नाशिक (Nashik Rain Alert) तसेच मराठवाड्यातील छत्रपती संभाजीनगर (Sambhajinagar Rain Alert) जिल्ह्यासाठी वादळी पाऊस आणि तुरळक गारपिटीची शक्यता व्यक्त केली आहे. या पार्श्वभूमीवर संबंधित जिल्ह्यांना येलो अलर्ट (Maharashtra Rain Yellow Alert) जारी करण्यात आला आहे. याशिवाय राज्यातील इतर अनेक भागांतही मेघगर्जनेसह वादळी पावसाचा अंदाज असल्याने नागरिकांनी आणि शेतकऱ्यांनी सतर्क राहण्याचे आवाहन करण्यात आले आहे.

गेल्या काही दिवसांपासून राज्यात उष्णतेची तीव्रता कमी झाली असली, तरी वातावरणातील आर्द्रता वाढल्यामुळे उकाड्याचा त्रास कायम आहे. दुपारच्या वेळेत उन्हाचा चटका जाणवत असून, काही भागांत ढगाळ वातावरणामुळे तापमानात चढ-उतार होत आहेत. देशभरातील शेतकऱ्यांचे लक्ष लागून असलेल्या मान्सूनच्या केरळमधील (Kerala Monsoon Update) आगमनाचा यंदाचा मुहूर्त काहीसा लांबला आहे. भारतीय हवामान विभागाच्या माहितीनुसार, अरबी समुद्रात ढग दाटून आले असून मान्सून केरळच्या उंबरठ्यावर येऊन ठेपला आहे. पुढील दोन दिवसांत मान्सून केरळ तसेच तमिळनाडूच्या दक्षिणेकडील काही भागांत दाखल होण्याची शक्यता वर्तवण्यात आली आहे.

यंदा मान्सूनने अंदमान-निकोबार बेटांमध्ये १६ मे रोजी वेळेआधीच हजेरी लावून दमदार सुरुवात केली होती. त्यामुळे केरळमध्येही तो नेहमीपेक्षा लवकर, म्हणजे २६ मेच्या आसपास दाखल होईल, असा अंदाज व्यक्त करण्यात आला होता. मात्र वातावरणातील बदलांमुळे त्याच्या पुढील वाटचालीला काहीसा उशीर झाला आहे. सोमवारी मान्सूनची प्रगती स्थिर राहिली. तथापि, हवामान विभागाने दिलेल्या ताज्या माहितीनुसार पुढील ४८ तासांत केरळ, तमिळनाडूचा दक्षिण भाग, लक्षद्वीप परिसर, अरबी समुद्राचा काही भाग आणि बंगालच्या उपसागरातील आणखी काही क्षेत्रांमध्ये मान्सूनच्या आगमनासाठी अनुकूल परिस्थिती निर्माण झाली आहे.