Rahuri By-Election: राहुरी पोटनिवडणूक होणार चुरशीची; ठाकरेंचा हुकमी एक्का उतरला रिंगणात, पण...

सचिन बनसोडे, साम प्रतिनिधी

अहिल्यानगरच्या राहुरी विधानसभा पोटनिवडणुकीत अनेक नाट्यमय घडामोडी बघायला मिळत आहेत. शरद पवारांच्या राष्ट्रवादीचे प्राजक्त तनपुरे यांनी ऐनवेळी माघार घेतली, तर मविआतील घटक पक्ष असलेल्या शिवसेना ठाकरे गटाचे जिल्हा संघटक रावसाहेब खेवरे यांनी अपक्ष उमेदवारी अर्ज भरला आहे. तालुक्याच्या अस्मितेसाठी आपण उमेदवारी करत असल्याचं खेवरे यांनी अर्ज भरताना म्हटलंय.

तालुक्यातील सक्षम उमेदवार नसल्याने एक सक्षम उमेदवार म्हणून मी निवडणूक लढवत आहे. मातोश्रीवरून जर निरोप आला तर आपली भूमिका काय असेल असे विचारले असता, ते म्हणाले की, मी मातोश्रीवरून आलेल्या आदेशाचा नेहमीच आदर करतो, मात्र मातोश्रीवरून आदेश का येईल? काँग्रेसने स्वतंत्र एबी फॉर्म दिला, मलाही एबी फॉर्म मिळत होता मात्र मी कडवड हिंदू आहे. तालुक्याच्या प्रश्नांसाठी मी निवडणूक लढवत आहे, असं खेवरे यांनी म्हटलंय आहे.

दरम्यान अहिल्यानगरच्या राहुरी विधानसभा पोटनिवडणुकीसाठी एकूण 30 उमेदवारांनी 42 उमेदवारी अर्ज दाखल केले होते. आज झालेल्या छाननी प्रक्रियेत 7 उमेदवारांचे अर्ज अपात्र ठरवण्यात आले. एका उमेदवाराने आपला उमेदवारी अर्ज माघारी घेतलाय. तर 23 उमेदवारांचे अर्ज वैध ठरले आहेत अशी माहिती सहाय्यक निवडणूक अधिकारी तथा तहसीलदार डॉ. अमित पवार यांनी दिली आहे.

भाजप नेते शिवाजीराव कर्डिले यांच्या निधनानंतर रिक्त झालेल्या मतदारसंघातील पोटनिवडणुकीसाठी येत्या 23 एप्रिलला मतदान होणार आहे. तर 4 मे रोजी या पोटनिवडणुकीचा निकाल जाहीर होईल. राहुरी विधानसभा मतदारसंघात भाजपने दिवंगत नेते शिवाजीराव कर्डिले यांचे पुत्र अक्षय कर्डिले यांना उमेदवारी दिली आहे. तर शरद पवार गटाकडून प्राजक्त तनपुरे हे निवडणूक लढवणार असल्याची चर्चा होती. मात्र ऐनवेळी प्राजक्त तनपुरे उमेदवारी यांनी निवडणुकीतून माघार घेतली आहे.