Kolhapur Politics: हसन मुश्रीफांनी डाव पलटला; शिवसेनेच्या वाटेवर असलेल्या नेत्याला राष्ट्रवादीत आणलं!

कोल्हापूर कुस्तीसाठी जितकं ओळखलं जातं, तितकेच ते राजकारणासाठी ओळखलं जातं. कुस्तीमधील डावाप्रमाणे राजकीय नेते एकमेकांवर कुरघोडी करत समोरील पक्षाला चीतपट करत असतात. असाच एक कुस्तीचा एकेरी पटाप्रमाणे राष्ट्रवादीचे नेते हसन मुश्रीफांनी राजकारणात डाव टाकला. त्या डावात शिवसेना चीतपट झालीय. डावातून शिवसेनेच्या जवळ गेलेल्या गोकुळचे माजी अध्यक्ष आणि संचालक अरुण डोंगळेंना राष्ट्रवादीत आणण्यात ते यशस्वी झालेत.

गोकुळ दूध संघाच्या निवडणुकीच्या वेळी ज्येष्ठ नेते माजी अध्यक्ष विश्वास पाटील, माजी अध्यक्ष अरुण डोंगळे यांनी महाडिक गटाची साथ सोडली. पण आता राज्यात महायुतीचं सरकार आल्यानंतर सत्ता समीकरणे बदलली आहेत. कोल्हापूरमधील महत्त्वाची असलेली गोकूळ दूध संघाची पंचवार्षिक निवडणूक पुढील वर्षी होणार आहे.

त्याआधीच पक्षांकडून डावपेच आखणं सुरू झालंय. त्याचे उदाहरण हसन मुश्रीफ यांच्या एका राजकीय खेळीचे आहे. कधी शिवसेनेच्या स्टेजवर तर कधी राष्ट्रवादी काँग्रेसच्या स्टेजवर दिसणाऱ्या गोकुळचे माजी अध्यक्ष आणि संचालक अरुण डोंगळे यांना आपल्या पक्षात ओढून आलंय.

पुढच्या वर्षी गोकुळ दूध संघाची पंचवार्षिक निवडणूक होणार आहे. महायुतीमधील राष्ट्रवादी, भाजप आणि शिवसेनेचे सर्वच आमदार पदाधिकारी गोकुळच्या निवडणुकीत महायुती म्हणून उतरतील. अशातच मंत्री मुश्रीफ यांच्याकडे या निवडणुकीतील नेतृत्व देण्यात आलंय. त्यामुळे गोकुळ दूध संघात देखील मंत्री हसन मुश्रीफ यांची ताकद वाढलीय. अरुण डोंगळे हे काही महिन्यांपूर्वी उपमुख्यमंत्री एकनाथ शिंदे यांच्या अधिक जवळ गेले होते. डोंगळे हे शिवसेनेच्या संपर्कात असल्याची चर्चा होत होती.

पण हसन मुश्रफांच्या खेळीनं त्यांनी अखेर मंगळवारी(ता.23) राष्ट्रवादीत पक्ष प्रवेश केला. प्रदेशाध्यक्ष सुनील तटकरे यांच्या उपस्थितीत हा पक्षप्रवेशाचा कार्यक्रम मुंबईत पार पडला.विधानसभा निवडणुकीच्या वेळी प्रकाश आबिटकर यांच्या प्रचाराच्या माध्यमातून डोंगरे उपमुख्यमंत्री एकनाथ शिंदे यांच्या संपर्कात आले. हळूहळू शिवसेनेतील संपर्क वाढत गेला. सातत्याने संपर्क वाढल्याने डोंगळे हे शिवसेनेत पक्ष प्रवेश करणार असल्याची चर्चा जोरात सुरू होती.