Vitthal Rukmini Puja : विठ्ठल रुक्मिणी पूजेसाठी ऑनलाईन नोंदणी; २५ मार्चपासून अशी करा नोंदणी

पंढरपूर : विठ्ठल रुक्मिणी मातेची पूजा करण्यासाठी अनेक भाविकांची इच्छा असते. अशा विठ्ठल भक्तांसाठी आनंदाची बातमी आहे. कारण हि पूजा करण्यासाठी आपल्याला हव्या असलेल्या दिवशी पूजेची संधी मिळणार असून याकरिता भाविकांना ऑनलाईन नोंदणी करण्याची सुविधा सुरु करण्यात येत आहे. येत्या २५ मार्चपासून सदरची ऑनलाईन नोंदणी सुरू करण्यात येत आहे. यामुळे भाविकांसाठी हे सोयीचे ठरणार आहे. 

ग्रीष्म ऋतूतील वाढत्या उन्हापासून श्री विठुरायाला शीतलता मिळावी, यासाठी दरवर्षी चैत्र पाडव्यापासून मृग नक्षत्रात पावसाळ्याची सुरुवात होईपर्यंत दररोज दुपारी चंदनउटी पूजेची परंपरा आहे. त्यानुसार यंदाच्या या पूजेला गुढीपाडव्यापासून सुरुवात होत आहे. या चंदनउटी पूजेची नोंदणी देखील ऑनलाईन पद्धतीने करण्यात येणार असल्याची माहिती मंदिर समितीचे कार्यकारी अधिकारी राजेंद्र शेळके यांनी दिली आहे.

चार महिन्यांसाठी होणार नोंदणी 
विठ्ठल मंदिर समितीने पूजेसाठी ऑनलाईन नोंदणी सुरु केली जात आहे. १ एप्रिल ते ३१ जुलै या चार महिन्यांसाठी ही नोंदणी होणार आहे. यामध्ये भाविकांना चंदन उटी पूजेची नोंदणी करता येणार आहे. मंदिर समितीने श्री विठ्ठल रुक्मिणी मातेच्या नित्यपुजा, पाद्यपूजा, तुळशी अर्चन पूजा, चंदन उटी पूजा इत्यादी सर्व प्रकारच्या पूजा ऑनलाईन पध्दतीने नोंदणी सुरू केली आहे.

यावर करता येणार नोंदणी 

१ एप्रिल ते ३१ जुलै २०२५ या कालावधीतील सण, उत्सव व गर्दीचे दिवस वगळून इतर दिवशीच्या श्रींच्या नित्यपूजा, तुळशी अर्चन पूजा, पाद्यपूजा व चंदन उटी पूजा ऑनलाइन नोंदणीसाठी भाविकांना उपलब्ध करून देण्यात येत आहेत. भाविकांना पूजेची नोंदणी https://www.vitthalrukminimandir.org या मंदिर समितीच्या अधिकृत संकेतस्थळावरून करता येणार आहे.