Jawhar News : आश्रम शाळेतील बारावीच्या विद्यार्थीनीनं संपवले जीवन; २ महिन्यांत १० विद्यार्थ्यांचा मृत्यू

फैय्याज शेख 

जव्हार : पालघर जिल्ह्यातील जव्हार येथील आदिवासी विकास प्रकल्प कार्यालय अंतर्गत येणाऱ्या आश्रम शाळेतील विद्यार्थ्याचे मृत्यूचे प्रमाण वाढत चालले आहे. यात आणखी एका विद्यार्थिनींची भर पडली असून दहावीच्या वर्गात शिकणाऱ्या विद्यार्थिनीने गळफास घेत आत्महत्या केल्याची घटना समोर आली आहे. यामुळे खळबळ उडाली आहे. 

जून महिन्याच्या शेवटी शाळा व आश्रम शाळा सुरू झाल्या. मात्र आश्रम शाळा (Ashram School) सुरू झाल्यापासून ते आतापर्यंत एकट्या जव्हार आदिवासी विकास प्रकल्प कार्यालय अंतर्गत येणाऱ्या आश्रम शाळेत १० विद्यार्थ्यांचे मृत्यू झाल्याचे शासकीय आकडेवारीनुसार समोर आले आहे. आदिवासी मुलांना दर्जेदार शिक्षण मिळावे; म्हणून शासनाने आदिवासी आश्रम शाळेची निर्मिती केली. (Palghar) आश्रम शाळा सुरू झाल्यापासून मोठ्या प्रमाणात आदिवासी मुलांनी शिक्षण घेण्यास सुरुवात केली. एका आश्रम शाळेत ५०० ते १ हजार विद्यार्थी शिक्षण घेत आहेत. या करिता शासन कोट्यवधी रुपये खर्च करत आहे. मात्र आलीकडे आश्रम शाळेत शिक्षण घेणाऱ्या विद्यार्थ्यांचे मृत्यूचे प्रमाण वाढले आहे. 

जव्हार आदिवासी विकास प्रकल्प कार्यालय अंतर्गत येणाऱ्या देहरे, पलसुंडा, साकुर, विनवल, खुडेद अशा अनेक आश्रम शाळेत १० विद्यार्थ्यांचे मृत्यू झाल्याची धक्कादायक माहिती समोर आली आहे. यामुळे आश्रम शाळेत शिकणाऱ्या आदिवासी विद्यार्थ्यांचे जीवन धोक्यात आले आहे. यात कन्या आश्रम शाळा साकुर येथील दहावीच्या वर्गात शिकणारी शुभांगी रामदास पागी (वय १८) या विद्यार्थिनीने गळफास घेत आत्महत्या केल्याचे समोर आले आहे. मात्र तिने टोकाचे पाऊल कोणत्या कारणाने उचलले याचे कारण मात्र गुलदस्त्यात आहे. याबाबत पोलिसांकडून आता तपास सुरु करण्यात आला आहे.