Jalna News : अमृत ज्येष्ठ नागरिक सवलत योजनेचा वाहकाकडून गैरव्यवहार; वाहकावर निलंबनाची कारवाई

अक्षय शिंदे 
जालना : राज्य परिवहन महामंडळाच्या बसमधून प्रवास करणाऱ्या प्रवाशांसाठी वेगवेगळ्या सवलती देण्यात आल्या आहेत. यातील ज्येष्ठ नागरिकांसाठी देखील सवलत असून या अमृत ज्येष्ठ नागरिक सवलतीत बस वाहकांकडून गैरव्यवहार केल्याचे समोर आले. यावरून सदर वाचकावर गुन्हा दाखल करण्यात आला आहे. 

महाराष्ट्र राज्य परिवहन महामंडळाची (MSRTC) ज्येष्ठ नागरिकांसाठी असलेल्या अमृत ज्येष्ठ नागरिक सवलत योजनेमध्ये घोटाळा झाल्याची धक्कादायक माहिती जालन्यातून समोर येत आहे. जालन्यातील (Jalna) परतूर आगाराच्या एका वाहकाने अमृत जेष्ठ नागरिक सवलतीचे जास्तीचे बोगस तिकीट काढून जास्त प्रवाशी संख्या दाखवल्याचा प्रयत्न केला आहे. हा प्रकार उघडकीस आला. यानंतर सदर प्रकरणी विभागीय स्तरावर चौकशी करण्यात आली. यात वाहकाने हा प्रकार केल्याचे उघडकीस आले. 

वाहकावर निलंबनाची कारवाई 

सदर प्रकरणी चौकशी अंती दोषी असलेल्या बस वाहकावर निलंबनाची कारवाई करण्यात आली आहे. १९ ऑगस्टपासून ते पुढील आदेशापर्यंत वाहकाला निलंबित करण्यात आले आहे. त्यामुळे महाराष्ट्र राज्य मार्ग परिवहन महामंडळातील अमृत जेष्ठ नागरिक सवलतीचा घोटाळा समोर आला आहे. तसेच पोलिसात गुन्हा देखील दाखल करण्यात आल्याची माहिती आहे.