शरद पवार आणि अजितदादांची राष्ट्रवादी एक होणार? शोक सभेदरम्यान बड्या नेत्याने तारीखच सांगितली

योगेश काशिद, साम टीव्ही

अजित पवारांच्या निधनाने राज्याच्या राजकारणात राजकीय नेतृत्वाची पोकळी निर्माण झाली आहे. अजितदादांच्या जाण्याने दोन्ही राष्ट्रवादी काँग्रेसवर दु:खाचा डोंगर कोसळला आहे. या घटनेने राष्ट्रवादीतील नेतेमंडळी, कार्यकर्ते शोकाकुल झाले आहेत. अजित पवारांच्या निधनानंतर दोन्ही राष्ट्रवादींनी एकत्र यावे, अशी दोन्ही गटाच्या कार्यकर्त्यांची भावना असल्याचे समोर येत आहे. यादरम्यान अजित पवार गटाचे जिल्हाध्यक्ष राजेश्वर चव्हाण यांनी शोक सभेदरम्यान दोन्ही राष्ट्रवादी गट एकत्र येणार असल्याचा दावा केला आहे. या दाव्याने राजकीय वर्तुळात चर्चांना उधाण आलं आहे.

दोन्ही राष्ट्रवादी काँग्रेस येत्या आठ तारखेला एक होईल, याची घोषणा होईल, असा दावा बीडचे जिल्हाध्यक्ष राजेश्वर चव्हाण यांनी केला. आठ ते दहा तारखेच्या दरम्यान दोन्ही पक्षाचे विलीनीकरण जाहीर होईल. त्यानंतर पुन्हा कामाला लागू, असे विधान अजित पवारांच्या शोक सभेदरम्यान करण्यात आलं.

शरद पवार आणि अजितदादा दोघांच्या कार्यकर्त्यांना एक व्हायचं आहे. दोघे एकत्र येऊन शिव-शाहू-फुले-आंबेडकरांचे राजकारण महाराष्ट्रात करायचे आहे. जनतेसाठी अहोरात्र काम करणारा माणूस आपल्यातून निघून गेला. एकमेकांना भेटताना विकासाचे बोलू आणि काम करू आणि पुन्हा पक्ष उभारू अशी भूमिका दोन्ही राष्ट्रवादी काँग्रेसच्या कार्यकर्त्यांसमोर जिल्हाध्यक्षांनी मांडली.

अजित पवारांना श्रद्धांजली वाहताना आमदार संदीप क्षीरसागर यांना अश्रू अनावर

अजित पवार यांना श्रद्धांजली अर्पण करण्यासाठी बीडमध्ये राष्ट्रवादी काँग्रेस शरद पवार पक्षाच्या वतीने शोक सभेचे आयोजन करण्यात आले होतं. यावेळी बोलताना आमदार संदीप क्षीरसागर यांना अश्रू अनावर झाले. दोन्ही राष्ट्रवादी वेगळ्या झाल्या. तेव्हा आम्ही साहेबांना म्हणत होतो की, अजितदादांच्या हातात तुम्ही सूत्र द्या.. आता देखील पवार कुटुंब एकत्र बसून जो निर्णय घेईल. आम्ही त्या निर्णयासोबत राहणार आहोत. पवार कुटुंबाशिवाय आम्हाला काहीच दिसत नाही, अशा भावना आमदार संदीप क्षीरसागर यांनी व्यक्त केल्या.