Ashok Kharat Case: भोंदू बाबा अशोक खरातसोबत फोटो असणाऱ्या नेत्यांवर कारवाई होणार का? काय म्हणाले मुख्यमंत्री?

अशोक खरातचे राजकीय नेत्यांसोबत असणारे फोटोही चर्चेचा विषय ठरत आहेत. खरातवर राजकीय वरदहस्त असल्यानेच त्याने महिलांच्या अब्रुशी खेळ खेळण्याचा गोरख धंदा सुरू केला होता, असं म्हटलं जातंय. दरम्यान अशोक खरातसोबत अनेक राजकीय नेत्याचे फोटो व्हायरल झाले आहेत. ज्या नेत्यांचे फोटो आहेत, त्या नेत्यांवर कारवाई होणार का असा सवाल राज्यातील जनता करत आहे. तसेच विरोधी पक्षातील नेतेही खरातसोबत फोटो असणाऱ्या नेत्यांवरही कारवाई करण्यात यावी, अशी मागणी केली जाते आहे. यामुळे ज्यांचे फोटो आहेत, त्या नेत्यांचे धाबे दणाणले आहे.

मुख्यमंत्री देवेंद्र फडणवीस यांनी अशोक खरातची संपूर्ण कुंडली वाचून दाखवली. यावेळी भास्कर जाधवांनी नेत्यांच्या फोटोवरून प्रश्न केला होता. त्यावेळी मुख्यमंत्र्यांनी मोठं विधान केलं, असून फोटो असलेल्या नेत्यांची धाबे दणाणले आहे. अशोक खरात यांच्या संस्थेच्या संचालकांची आणि अधिकाऱ्यांची चौकशी केली जाणार आहे.

आर्थिकदृष्ट्या नाही तर संपूर्ण माहिती असतानाही कानाडोळा करणाऱ्या अधिकाऱ्यांवरही कारवाई करावी, अशी मागणी ठाकरे गटाचे नेते भास्कर जाधव यांनी केली. त्यानंतर राजकारणातील काही नेत्यांचे फोटो, नावं आली आहेत. जे गुंतले आहेत त्यांची चौकशी करणार का? असा सवालही भास्कर जाधव यांनी मुख्यमंत्र्यांना केला.

ज्या-ज्या व्यक्तीविरोधात पुरावा मिळेल, त्या प्रत्येकाची चौकशी करु. आपण सगळे राजकारणातील आहोत. त्यामुळे कोणाचा फोटो कोणासोबतही येतो हे आपण पाहिलं आहे. पण फक्त फोटो सोबत आहे यावरुन आरोपी करता येत नाही. दरम्यान आपण डिलीटेड डेटाही संपूर्ण काढला जात आहे. या डेटामधून कोणाचा संपर्क होता का? कोणी व्यवहार केला आहे का? कोणी मेसेज केला का?

हे उघड होईल. जो कोणी असेल त्याची चौकशी होणार, असं देवेंद्र फडणवीस यांनी सांगितलं आहे. एसआयटीमध्ये एका वरिष्ठ महिला अधिकाऱ्याला प्रमुख केलं आहे. त्यांचा ट्रॅक रेकॉर्ड चांगला आहे. आपण कोणालाही पाठीशी घालणार नाही. कोणीही थेट किंवा अप्रत्यक्ष मदत केली असेल तरी धडा शिकवला जाईल," असंही फडणवीस म्हणाले.