Vasai Crime: बदलापूरनंतर नालासोपारा हादरलं; ७ वर्षीय मुलीवर लैंगिक अत्याचाराचा प्रयत्न, दोन दिवसांनी गुन्हा दाखल

बदलापूरमधील लैंगिक अत्याचाराची घटना ताजी असतानाच वसईत एक धक्कादायक घटना घडलीय. नालासोपाऱ्यात ७ वर्षीय मुलीचा विनयभंग, तसेच लैंगिक अत्याचार करण्याचा प्रयत्न झाल्याची घटना समोर आलीय. विशेष म्हणजे तक्रार करण्यासाठी ११२ वर संपर्क साधला असता, कोणत्याच प्रकरची मदत मिळाली नाही. पीडितेच्या नातेवाईकांना पोलीस स्टेशनमध्ये जा असं सागंण्यात आला होतं. राज्यात महिला सुरक्षेचा प्रश्न ऐरणीवर असतांनाच पोलिसांचा निष्काळाजीपणा समोर आलाय.

मिरा भाईंदर वसई विरार पोलिसांचा ढिसाळ कारभार समोर आलाय. हाती आलेल्या माहितीनुसार, नालासोपाऱ्यात एका सात वर्षाच्या मुलीचा विनयभंग करत तिच्यावर अत्याचार करण्याचा प्रयत्न झाल्याची घटना घडली. ही घटना दोन दिवसापूर्वी घडली, मात्र पोलिसांनी दोन दिवसानंतर गुन्हा दाखल केल्याची बाब समोर आल्यानं पोलीस यंत्रणेवर प्रश्न निर्माण होत आहे. तक्रार नोंदवण्यासाठी पोलीस मदतीसाठी ११२ वर फोन केला असता,पोलीस ठाण्यात जा असे उत्तर देण्यात आल्याचा आरोप पीडितेच्या नातेवाईकांनी केलाय.

पोलीस ठाण्यात गेले असता गुन्हा दाखल करू नका, असे सांगण्यात आलं. तुम्हाला त्रास होईल, मुलीला इथे तिथे तपासासाठी घेऊन जावे लागेल, असं पोलीस ठाण्यातील संबंधित अधिकाऱ्याने तक्रारदाराला सांगितल्याचं माहिती संबंधित व्यक्तींनी दिलीय. मिळालेल्या माहितीनुसार, सोमवारी सकाळी १०.३० वाजता विनयभंगाची घटना घडली. त्यानंतर बुधवारी रात्री १ वाजता विनयभंग,पोस्को अंतर्गत गुन्हा दाखल करण्यात आला. राज्यात महिला सुरक्षे प्रश्न ऐरणीवर असतांना पोलिसांनी या गंभीर प्रकरणी दोन दिवसानंतर गुन्हा दाखल का केला? त्यामुळे तुलिंज पोलिसांच्या कारभारावर प्रश्न उपस्थित होत आहे. या संदर्भात तुलिज पोलीस ठाण्याचे वरिष्ठ पोलीस निरीक्षक शैलेश नगरकर यांच्याशी या घटनेबाबत माहिती घेण्याचा प्रयत्न केला गेला. मात्र त्यांनी कोणतीच माहिती दिली नाहीये.