'६,५०० रूपयातील साडेचार मॅडमच्या खात्यात पाठव'; शेतकऱ्याच्या अनुदानावर शासकीय कर्मचाऱ्याचा डोळा, Audio क्लिप व्हायरल

पराग ढोबळे, साम टिव्ही

नागपूर जिल्ह्यातील नरखेड तालुक्यातील पेठमुक्तापूर गावातून एक धक्कादायक प्रकार उघडकीस आला आहे. शेतीचे पंचनामे करणाऱ्या शासकीय कर्मचाऱ्यांचा प्रताप समोर आला आहे. शासकीय कर्मचाऱ्यांनी शेतकऱ्यांकडे पैशांची मागणी केली असल्याचा गंभीर आरोप केला आहे. दरम्यान, शासकीय कर्मचारी आणि शेतकऱ्यामधील संभाषणाचा ऑडिओ क्लिप समोर आला. हा ऑडिओ क्लिप सोशल मीडियात व्हायरल होत आहे. यात त्यांनी शेतकऱ्याला मिळालेल्या अनुदानातून पैशांची मागणी केली आहे.

मिळालेल्या माहितीनुसार, हा सर्व प्रकार नागपूर जिल्ह्याच्या नरखेड तालुक्यातील पेठमुक्तापूर येथील असल्याचं बोललं जात आहे. समाजमाध्यमांमध्ये या घटनेसंबंधित ऑडिओ क्लिप व्हायरल होत आहे. यात शासकीय कर्मचारी शेतकऱ्यासोबत बोलत आहे. 'खात्यात ६ हजार ५०० रूपये जमा होतील. त्यातील दोन हजार तुझ्याकडे ठेव. उरलेले ४ हजार ५०० रूपये मॅडमला परत दे', असं शासकीय कर्मचारी शेतकऱ्याला म्हणत आहे.

ही ऑडिओ क्लिप व्हायरल झाल्यानंतर शेतकरी संतप्त झाले. शेतकऱ्याला मिळालेल्या अनुदानातून शासकीय कर्मचाऱ्याने पैशांची मागणी केल्यामुळे सोशल मीडियावरही संताप व्यक्त केला जात आहे. अनुदान वितरणात मोठा घोळ झाल्याचा आरोप करण्यात येत आहे.

शेतकऱ्यांच्या म्हणण्यानुसार, काही कर्मचाऱ्यांनी पैशाच्याआधारे नुकसानीचे पंचनामे केल्याचा संशय आहे. पैसे न देणाऱ्या शेतकऱ्यांच्या खात्यात अत्यल्प रक्कम जमा करण्यात आल्याचा आरोपही शेतकऱ्यांनी केला आहे. ग्रामपंचायतीच्या माध्यमातून आणि कचराच्या करारांच्या आडून पैशांची मागणी केली जात असल्याचं सांगितलं जात आहे.

दरम्यान, या प्रकरणाची चौकशी व्हावी म्हणून शेतकऱ्यांनी गटविकास अधिकारी आणि तहसीलदार यांच्याकडे तक्रार दाखल केली. तसेच चौकशी करण्याची मागणी केली. व्हायरल झालेल्या ऑडिओ क्लिपबाबत 'साम टिव्ही' कोणताही दावा किंवा पुष्टी करत नाही.