'रोहित पवार भाजप नेत्यांना भेटतात, शरीराने शरद पवारांसोबत पण मनाने..'; भाजपमधील बड्या नेत्याचा मोठा गौप्यस्फोट

'रोहित पवार हे मनाने भाजपसोबत पण शरीरानं शरद पवारांसोबत', असा खळबळजनक गौप्यस्फोट राज्याचे बंदर व मत्स्य विकास मंत्री नितेश राणेंनी केला आहे. पत्रकारांशी संवाद साधताना त्यांनी ही प्रतिक्रिया दिली आहे. त्यांनी केलेल्या गौप्यस्फोटामुळे अनेकांच्या भुवया उंचावल्या आहेत. दरम्यान, एका वृत्तवाहिनीशी बोलताना रोहित पवारांनी राष्ट्रवादीत ३ गट पडले असल्याचा दावा केला होता. मात्र, आज नितेश राणे यांनी रोहित पवारांबाबत केलेल्या दाव्यामुळे राजकीय वर्तुळात खळबळ उडाली आहे.

एका बड्या नेत्यानं रोहित पवार भाजपसोबत जाणार असल्याचा गौप्यस्फोट केला होता. यावर नितेश राणेंनी प्रसारमाध्यमांशी संवाद साधताना प्रतिक्रिया दिली आहे. 'रोहित पवार २०१९ साली भाजपमध्ये जाणार होते. ते भाजप नेत्यांना कधी कधी भेटतात. भाजपमधील कोणकोणत्या मंत्र्यांच्या ते संपर्कात आहेत, हे देखील बघा', असा गौप्यस्फोट नितेश राणेंनी केला.

'रोहित पवार शरीरानं शरद पवार यांच्यासोबत आहेत. पण मनाने ते भाजपसोबत आहेत', असा देखील दावा नितेश राणे यांनी केला. त्यांनी केलेल्या दाव्यामुळे राजकीय वर्तुळात खळबळ उडाली आहे. यावर रोहित पवार काय प्रतिक्रिया काय देणार? हे पाहणं आता महत्वाचं ठरणार आहे.

राष्ट्रवादीत २ नाहीतर, ३ गट - रोहित पवार

राष्ट्रवादीत २ नाही तर, ३ गट असल्याचा खळबळजनक दावा, आमदार रोहित पवार यांनी एका वृत्तवाहिनीला दिलेल्या मुलाखतीत केला आहे. अजित दादांच्या राष्ट्रवादीत २ गट निर्माण झाल्याचा दावाही यावेळी त्यांनी केला आहे. अजित पवारांच्या राष्ट्रवादीतील कोकणातील नेते स्वत: ला खरंतर बॉ़स समजतात, असं रोहित पवारांनी सुनील तटकरेंचं नाव न घेत अप्रत्यक्ष निशाणा साधला.

एका वृत्तवाहिनीला दिलेल्या मुलाखतीत रोहित पवार म्हणाले, 'राष्ट्रवादीत फूट पडली अन् २ गट तयार झाले. शरद पवारांची राष्ट्रवादी आणि अजित पवारांची राष्ट्रवादी. अजित दादांची राष्ट्रवादी सत्तेत आलं. पण आता दादांच्या राष्ट्रवादीत २ गट तयार झाले आहेत', असं रोहित पवार म्हणाले आहेत. 'अजित पवारांवर आरोप झाल्यास पक्षातील किती नेते त्यांची बाजू घेतात?', असा सवालही त्यांनी उपस्थित केला. तसेच, 'तटकरेंवर पत्ते उधळल्यास काहीजण मारहाण करतात', असं म्हणत रोहित पवार यांनी राष्ट्रवादीतील गटबाजीवर निशाणा साधला.