स्प्रे मारून बेशुद्ध, शेतात नेत अत्याचार अन् बांधून टाकलं; बीडमध्ये अल्पवयीन मुलीसोबत भयंकर कृत्य | Beed News

योगेश काशिद, साम टिव्ही प्रतिनिधी

बीडमध्ये गुन्हेगारी घटनांमध्ये वाढ होत असल्याचं चित्र आहे. अशातच बीडमधून एक धक्कादायक बातमी समोर येत आहे. एका अल्पवयीन मुलीचे अपहरण करून तिचे हातपाय बांधून शेतात टाकून दिल्याची घटना उघडकीस आली आहे. गंभीर बाब म्हणजे गतवर्षी देखील दोन वेळा असाच प्रकार घडला होता. त्यावेळी पालकांनी याबाबत तक्रार दाखल केली होती. मात्र, पोलिसांकडून कारवाई झालेली नाही. दरम्यान, या घटनेनंतर परिसरात खळबळ उडाली आहे.

पीडित अल्पवयीन मुलगी बीडच्या शिरुर तालुक्यातील वडाळी गावातील रहिवासी असल्याची माहिती आहे. घटनेच्या दिवशी अल्पवयीन मुलगी घराच्या पाठीमागील बाजूस गेली होती. दरम्यान, २ अज्ञात आले त्यांनी तिच्या चेहऱ्यावर स्प्रे मारला. यानंतर तिला गुंगी आली. ती जागेवरच बेशुद्ध झाली.

यानंतर अज्ञात आरोपींनी तिला ओढत शेतात नेलं. तसेच तिचा विनयभंग केल्याची माहिती आहे. नंतर तिथेच तिला बांधून शेतात टाकून दिले. या प्रकरणाची माहिती पीडित मुलीच्या पालकांना मिळताच त्यांनी घटनास्थळी धाव घेतली. तसेच मुलीची सुटका केली. संतप्त पालकांनी तातडीने पोलीस ठाण्यात धाव घेतली.

तसेच २ अज्ञात आरोपींविरोधात तक्रार दाखल केली. तक्रारीनुसार, आरोपींविरोधात शिरुर पोलिस ठाण्यात गुन्हा दाखल करण्यात आला आहे. दरम्यान, याआधीही अशीच घटना घडली होती. पालकांनी तक्रारही दाखल केली होती. मात्र, पोलिसांनी कोणतीही कारवाई झालेली नव्हती. मात्र, आता तिसऱ्यांदा ही घटना घडल्यामुळे गावकऱ्यांमध्ये संतप्त वातावरण आहे. किमान आता तरी पोलिसांनी या प्रकरणाचा सखोल तपास करावा अशी मागणी पालकांनी केली आहे..