MHT-CETचा निकालही वादाच्या भोव-यात; निकाल फेरतपासणीची विद्यार्थ्यांची मागणी

युजीसी नीट च्या निकालातील गोंधळ अजूनही संपलेला नसताना MHT-CET चा निकालही वादात सापडलाय. विद्यार्थी आणि पालकांनी या निकालावर संशय व्यक्त केलाय. कारण MHT-CETच्या निकालाबाबत 'आन्सर की' म्हणजेच उत्तरपत्रिके आधारे मिळालेले मार्क आणि पर्सेन्टाईल यात तफावत असल्याची तक्रार विद्यार्थी आणि पालकांनी केलीय. हा विद्यार्थ्यांच्या कष्टावर पाणी फेरण्याचा प्रकार असल्याची टीका सुषमा अंधारेंनी केलीय.

MH-CETचा निकाल लागण्यापूर्वी CET सेलच्या वेबसाईटवर उत्तरपत्रिका अपलोड करण्यात आली होती. काही विद्यार्थ्यांनी या 'अन्सर की'चे स्क्रीन शॉट काढून ठेवले होते. 'आन्सर की'नुसार जे गुण मिळायला हवे होते, त्याच्याशी निकालात दिलेले गुण जुळत नसल्याचं विद्यार्थ्यांचं म्हणणं आहे. यासंदर्भात विद्यार्थ्यांनी ठाकरे गटाकडे तक्रारी केल्यामुळे आदित्य ठाकरेही सीईटी आयुक्तांची भेट घेणार आहेत.

तसंच याबाबत उच्च व तंत्रशिक्षणमंत्री चंद्रकांत पाटलांना ठाकरेंच्या युवा सेनेनं पत्रही पाठवलंय. मात्र यातून विद्यार्थ्यांना दिलासा मिळणार का हा खरा प्रश्न आहे.