Nagpur Fire : नागपुरात मिलला भीषण आग; कंपनीचं अंदाजे ४० ते ५० कोटींचं नुकसान

पराग ढोबळे, साम टीव्ही

Nagpur : नागपूर जिल्ह्याच्या पारशिवनी येथील आमडी फाट्याजवळील गिरीराज स्पीनींग मिलमध्ये आज रविवारी पहाटे आग लागल्याची घटना घडली. या आगीमुळे अंदाजे 40 ते 50 कोटीचे नुकसान झालं आहे. या आगीवर पाण्याचा मारा सुरू आहे. कापूस असल्यानं आग धुसमत आहे.

कंपनीच्या परिसरात मोठ्या प्रमाणात कापसापासून तयार केलेल्या गठाणीसह सरकी, शेतकऱ्यांकडून खरेदी केलेला कापूस आदी साहित्य होते.यावेळी जिनिंग प्रेसिंगमधील मशीनमधून शॉर्टसर्किट होऊन आग लागल्याचा अंदाज व्यक्त केला जात आहे. कंपनीत मोठ्या प्रमाणात कापसाला आग लागली.

या आगीत जवळपास 35 हजार क्विंटल कापूस तर तीन ते चार हजार कापसाच्या गटाने हजार क्विंटल ढेप, सरकी रुई आणि मशिनरी आगीच्या कचाट्यात आल्या आहेत. यावेळी आगीमुळे परिसरातील लोखंडी खांबाही तापमानामुळे वितळले. या आगीमध्ये कोट्यावधी रुपयांचं नुकसान झालं आहे.

पुण्यात हॉटेलला आग, एकाचा मृत्यू

पुण्यातील धनकवडी, के के मार्केट येथी चहाच्या साईबा हॉटेलमध्ये सिलिंडरमुळे आगीची घटना घडली आहे. या आगीत हॉटेलमधील साहित्य जळाले आहेत. शेजारील दोन कपड्याच्या दुकानांना झळ तर या आगीत हॉटेलमधील एका कामगाराचा दुर्देवी मृत्यू झाला आहे.

अग्निशमन दलाने आग आटोक्यात आणली. अग्निशमन दलाकडून वायूगळती असलेले तीन सिलिंडर ताब्यात घेण्यात आले. संतोष हेगडे असं मृत्यू झालेल्या कामगाराचे नाव आहे. संतोष चहाच्या दुकानात पहिल्याच दिवशी कामावर आला होता. आगीत मृत्यू झालेल्या कामगाराचा मृतदेह शिवविच्छेदनासाठी ससून रुग्णालयात घेऊन गेल्याची माहिती हाती आली आहे.