Nagpur Accident: नागपुरात मोठा अपघात; चालकाचे नियंत्रण सुटले कार थेट भिंतीवर धडकली, ५ जण गंभीर जखमी

नागपुरात शुक्रवारी सायंकाळी झालेल्या भीषण अपघातात एका भरधाव कारचे नियंत्रण सुटल्याने ती खोलगट भागात कोसळली आणि भिंतीवर जोरदार धडकली. या दुर्घटनेत पाच जण गंभीर जखमी झाले असून, त्यांच्यावर खासगी रुग्णालयात उपचार सुरू आहेत. ही घटना अंबाझरी पोलीस ठाण्याच्या हद्दीत घडली.

सदके रझाक हे कार चालवत असताना अंबाझरीकडून कॅम्पसकडे जात होते. मात्र, अचानक कारवरील त्यांचे नियंत्रण सुटले आणि भरधाव कार माणिकराव कुंभारे यांच्या मालकीच्या भिंतीवर आदळली. या धडकेत भिंतीचे मोठे नुकसान झाले असून कारमधील प्रवाशांना गंभीर दुखापत झाली आहे.

अपघातात वेदांत जाधव आणि तीन महिला जखमी झाल्या आहेत. या महिलांची नावे कीर्ती सुभाष गोले, गौरी अतुल सावरकर आणि पूजा धनंजय झाडे अशी आहेत. अपघातानंतर सर्व जखमींना तातडीने जवळच्या खासगी रुग्णालयात दाखल करण्यात आले आहे. डॉक्टरांनी त्यांची प्रकृती स्थिर असल्याचे सांगितले असले तरी त्यांच्यावर उपचार सुरूच आहेत.a

दरम्यान, घटनेची माहिती मिळताच अंबाझरी पोलिसांनी घटनास्थळी धाव घेतली. पोलिसांनी अपघाताचा पंचनामा करून संबंधित कार चालकाविरोधात गुन्हा दाखल केला आहे. अपघाताचे नेमके कारण काय होते, कारचे ब्रेक फेल झाले होते का, चालक मद्यप्राशन करून गाडी चालवत होता का, यासंदर्भात पोलिसांकडून चौकशी सुरू आहे.