राज्यामध्ये उन्हाचा पारा दिवसेंदिवस वाढत चालला आहे. मुंबईसह विदर्भ, मराठवाडा, उत्तर महाराष्ट्र आणि पश्चिम महाराष्ट्रामध्ये कडाक्याच्या उन्हामुळे नागरिक हैराण झाली आहेत. अंगाची अक्षरश:लाही होत असून घामाच्या धारा वाहत आहेत. अशामध्ये उन्हाळ्यात शाळांना कॉलेजला सुट्टी लागल्यामुळे बरेच जण थंड हवेच्या ठिकाणी जाणे पसंत करतात. पण यंदा महाराष्ट्रातील थंड हवेच्या ठिकाणी देखील तापमान चांगलेच वाढले आहेत. त्यामुळे नागरिकांनी या पर्यटन ठिकाणी देखील पाठ फिरवली आहे.
महाष्ट्रात लोणावळा- खंडाळा, माथेरान, महाबळेश्वर आणि भंडारदरा ही थंड हवेची ठिकाणं आहेत. याठिकाणी पर्यटक मोठी गर्दी करत असतात. हिवाळा, पावसाळ्याप्रमाणे उन्हाळ्यात देखील या ठिकाणांना पर्यटक पसंती देतात. पण यंदा तापमानात कमालीची वाढ झाल्यामुळे ही थंड हवेची ठिकाणं देखील तापली आहेत. माथेरान येथे सरासरी कमाल तापमानाची नोंद ही मुंबईपेक्षाही अधिक झाली आहे. तर महाबळेश्वर येथेही उन्हाचा पारा चढता पाहायला मिळत आहे.
हवामान खात्याने दिलेल्या अंदाजानुसार कोकण किनारपट्टीसह राज्याच्या बहुतांश भागांत उष्णतेची लाट परतली आहे. अनेक भागांत कमाल तापमानाचा पारा ३५ ते ४० अंशांच्या वर पोहचला आहे. महाराष्ट्रातल्या थंड हवेच्या ठिकाणी उकाडा वाढल्यामुळे पर्यटकांची गर्दी कमी पाहायला मिळत आहे. अशामध्ये राज्यात पुढील तीन दिवस तापमान वाढण्याचा अंदाज हवामान विभागाने वर्तविला आहे.
हवामान खात्याने दिलेल्या माहितीनुसार, राजस्थान, गुजरातमधून उष्ण वारे वाहत आहेत. अवकाळी पावसाचे प्रमाणही कमी झाले असल्याने उष्णता आणखी वाढली आहे. राज्यात पुढील तीन दिवसात कमाल तापमानात आणखी वाढ होण्याची शक्यता आहे. कोकण किनारपट्टीवर तापमान वाढून उष्णतेच्या लाटेसदृश स्थिती निर्माण होण्याची शक्यता असल्याने किनारपट्टीला यलो अलर्ट देण्यात आला आहे.
महाबळेश्वर - 35 अंश सेल्सिअस
माथेरान - 38 अंश सेल्सिअस
लोणावळा - 38 अंश सेल्सिअस
खंडाळा - 39 अंश सेल्सिअस
भंडारदरा - 38 अंश सेल्सिअस
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.