खासदार संजय जाधव पुन्हा निवडून आले, तर ED च्या भीतीने भाजपमध्ये जातील, असं भाकित वंचित बहुजन आघाडीचे परभणीचे उमेदवार पंजाबराव डख यांनी केलं आहे. महादेव जानकर जिल्ह्याबाहेरील उमेदवार असून ते निवडून आल्यास संविधान बदलील, अशी टीकाही पंजाबराव डख यांनी केली आहे.
शेतकऱ्यांच्या मुलाला पराभूत करण्यासाठी पंतप्रधान मोदींना परभणीत सभा घ्यावी लागते, असा टोलाही डख यांनी लगावला आहे. परभणी लोकसभा मतदारसंघात तिरंगी लढत होत आहे. शिवसेना ठाकरे गटाने (Uddhav Thackeray) या मतदारसंघातून विद्यमान खासदार संजय जाधव यांना उमेदवारी दिली आहे.
त्यांच्या विरोधात भाजपने महादेव जानकर यांना निवडणुकीच्या रिंगणात उतरवलं आहे. तर वंचित बहुजन आघाडीकडून पंजाबराव डख यांनी निवडणूक अर्ज भरला आहे. त्यामुळे परभणीत नेमका कोणत्या पक्षाचा झेंडा फडकणार याकडे सर्वांचं लक्ष लागून आहे.
परभणी लोकसभा मतदारसंघात (Lok Sabha Election 2024) आपआपल्या उमेदवारांच्या प्रचारासाठी महायुती आणि महाविकास आघाडीने जंगी सभा घेतल्या आहेत. महादेव जानकरांच्या प्रचारासाठी नरेंद्र मोदी परभणीत येऊन गेले आहेत. तर उद्धव ठाकरे यांनी देखील या मतदारसंघात जंगी सभा घेतली आहे.
दुसरीकडे पंजाबराव डख यांनी देखील वंचितकडून जोरदार प्रचार सुरु केला आहे. प्रचारादरम्यान ते महाविकास आघाडी आणि महायुतीवर जोरदार निशाणा साधत आहेत. संजय जाधव परभणीतून पुन्हा निवडून आल्यास ईडीच्या धाकाने भाजपमध्ये जातील, असं पंजाबराव डख यांनी म्हटलं आहे.
त्याचबरोबर महादेव जानकर हे जिल्ह्याबाहेरील उमेदवार असून ते निवडून येण्यापूर्वीच संविधान बदलण्याची भाषा करीत आहेत. त्यामुळे मतदारांनी जागरुक होऊन वंचित बहुजन आघाडीला मतदान करावं, असं आवाहन पंजाबराव डख परभणीकरांना करीत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
