मोठी बातमी! महायुतीच्या मंत्र्याला कोणत्याही क्षणी अटकेची शक्यता, अटक वॉरंटबाबत अपडेट आली समोर

Arrest Warrant Likely Against Mahayuti Minister Manikrao Kokate latest news : देवेंद्र फडणवीस यांच्या मंत्रिमंडळात क्रीडा मंत्री असलेले राष्ट्रवादी काँग्रेस (अजित पवार गट) नेते माणिकराव कोकाटे यांच्या अडचणी वाढल्या आहेत. त्यांना कोणत्याही क्षणी अटक होण्याची शक्यता वर्तवण्यात येत आहे. त्यांच्याविरोधात अटक वॉरंट निघणार असल्याची माहिती खात्रीलायक सूत्रांनी दिली आहे. प्रथम वर्ग न्यायालयाने दिलेली शिक्षा जिल्हा सत्र न्यायालयाने कायम ठेवताना कोकाटे यांच्या अटकेचे निर्देश दिले आहेत. (Arrest Warrant Likely for Mahayuti Minister Manikrao Kokate After Court Verdict)

१९९५ मध्ये शासकीय कोट्यातील सदनिका गैरव्यवहार प्रकरणात नाशिक जिल्हा सत्र न्यायालयाने प्रथम वर्ग न्यायालयाची दोन वर्षे कारावास आणि १० हजार रुपये दंडाची शिक्षा कायम ठेवली. या प्रकरणात कोकाटे आणि त्यांचे बंधू विजय कोकाटे यांनी बनावट कागदपत्रे सादर करून अल्प उत्पन्न गटासाठीच्या सदनिका बळकावल्याचा आरोप होता. न्यायालयाच्या या निर्णयानंतर कोकाटे यांच्या अटकेसाठी वॉरंट जारी होण्याची शक्यता आहे. यामुळे त्यांची आमदारकी आणि मंत्रिपद धोक्यात आले आहे. विरोधकांनी राजीनामा देण्याची मागणी केली आहे. पण दुसरीकडे कोकाटे उच्च न्यायालयात अपील करणार असल्याची माहिती समोर आली आहे.

माणिकराव कोकाटे सध्या महाराष्ट्राचे क्रीडा मंत्री आणि राष्ट्रवादी काँग्रेस (अजित पवार गट) चे नाशिक जिल्ह्यातील आमदार आहेत. . त्यांचं दुसऱ्यांदा मंत्रिपद धोक्यात आले आहे. यावेळी त्यांच्यावर अटकेची टांगती तलवार आहे. १९९५ मधील प्रकरणामुळे कोकाटे अन् त्यांचे बंधू अडचणीत आले आहेत. नाशिकमध्ये शासकीय कोट्यातून गरीबांसाठी (अल्प उत्पन्न गट) सदनिका मिळवण्यासाठी त्यांनी आणि त्यांच्या भावाने बनावट कागदपत्रे दाखवली, असा आरोप आहे. त्यात त्यांनी आपले उत्पन्न कमी दाखवले आणि सदनिका बळकावल्याचाही आरोप आहे. हे प्रकरण माजी मंत्री तुकाराम दिघोळे यांनी उघड केले होते. फेब्रुवारी २०२५ मध्ये नाशिकच्या प्रथम वर्ग न्यायालयाने कोकाटे आणि त्यांच्या भावाला दोन वर्ष तुरुंगवास आणि दंडाची शिक्षा दिली. त्यावर अपील केले होते. आता १६ डिसेंबर २०२५ रोजी नाशिक जिल्हा सत्र न्यायालयाने ही शिक्षा कायम ठेवली आहे.