मविआच्या एकीवर ठाकरेंचे प्रश्नचिन्ह ; मविआच्या बैठकीला 23 आमदारांची दांडी

विधान परीषद निवडणूक आणि ऑपरेशन टायगरमुळे राज्यातलं राजकीय वातावरण ढवळून निघालंय. या निवडणुकीत मविआला एकही जागा जिंकता आली नाही. काँग्रेसच्या काही उमेदवारांनी तर ऐनवेळी माघार घेऊन पक्षाला तोंडघशी पाडलंय. तर तिकडे ठाकरे सेनेच्या सहा खासदारांनी पक्षाला जय महाराष्ट्र करत शिंदे सेनेते प्रवेश केलाय. विरोधक बॅकफूटवर गेलेले असतानाच महाविकास आघाडीची मुंबईत महत्वाची बैठक पार पडली. या बैठकीत उद्धव ठाकरेंनी मविआच्या एकीवर प्रश्नचिन्ह उपस्थित केलंय. रस्त्यावर आणि विधीमंडळातही तीन्ही पक्षांची एकजुट हवी, अशी अपेक्षा व्यक्त केली आहे. ठाकरेंनी नेमके काय सवाल उपस्थित केलेत पाहूया.

काय म्हणाले उद्धव ठाकरे?

मविआ म्हणून आपण खरंच एकत्र आहोत?

आपण सभागृहात एकत्र आहोत का?

मविआ म्हणून आपण एकत्रित मुद्दे मांडतो?

आपण सगळ्यांनी एकी दाखवली पाहिजे

राज्यभरातील सभा, बैठका, आंदोलनंसुद्धा एकत्रित करायला हवी

केवळ कागदावरच मविआ आहे का ? असा सवाल उपस्थित करण्याची वेळ आली आहे. कारण फोडाफोडीचं राजकारणाला उत आलेला असताना आणि सहा खासदार फुटीच्या पार्श्वभूमीवर या बैठकीला विधानसभा आणि विधान परिषदेच्या एकूण 60 आमदारांपैकी 37 आमदार उपस्थित होते. विरोधी पक्षांचे 23 आमदार अनुपस्थित राहिल्याने चर्चेला उधाण आलंय. त्यालील 16 आमदारांची नावे साम टीव्हीच्या हाती आली आहेत. त्यामध्ये त्यालील 16 आमदारांची नावे साम टीव्हीच्या हाती आली आहेत.

दरम्यान, बैठकीला गैरहजर असणाऱ्या आमदारांमध्ये नाना पटोले, विजय वडेट्टीवार आणि जयंत पाटलांसारख्या बड्या नेत्यांचा समावेश असल्यानं अनेकांच्या भूवया उंचावल्यात. मात्र या नेत्यांनी बैठकीला गैरहजर राहण्याचं कारण सांगितलं आहे. ठाकरेसेनेचे खासदार फुटल्यानंतर मविआतील इतर पक्षाचेही आमदार, नगरसेवक फुटण्याची चर्चा सुरु झाली आहे. मात्र आमचा एकही आमदार फुटणार नाही, असा ठाम विश्वास शरद पवार यांनी व्यक्त केलाय.

सत्ताधाऱ्यांच्या फोडाफोडीच्या राजकारणात आता विरोधकांची खऱ्या अर्थाने कसोटी लागणार आहे. आपले आमदार तर सांभाळावे लागणार आहेतच दुसरीकडे महागाई, गुन्हेगारी, बेरोजगारी या मुद्यांवरुन विरोधकांना रान उठवावं लागणार आहे. उद्धव ठाकरेंनी सुनावल्यानंतर तरी मविआतल्या तिनही पक्षांची एकजूट रस्त्यावर दिसणार का ? हे पाहणं महत्वाचं आहे.