Maharashtra Politics: नाशिकमध्ये एकनाथ शिंदेंची मोठी खेळी, २ माजी महापौर शिवसेनेच्या गळाला

Summary -

• नाशिक राजकारणात मोठी उलथापालथ

• नाशिकमध्ये एकनाथ शिंदेंची मोठी राजकीय खेळी

• दोन माजी महापौर शिवसेना शिंदे गटात प्रवेश करणार

• महापालिका निवडणुकीपूर्वी शिंदे गटाची ताकद वाढली

अभिजित सोनावणे, नाशिक

महापालिका निवडणुकीदरम्यान नाशिकमध्ये मोठी राजकीय घडामोड घडली आहे. नाशिकमध्ये उपमुख्यमंत्री एकनाथ शिंदे यांनी मोठी राजकीय खेळी केली आहे. नाशिकमधील दोन माजी महापौर शिवसेना शिंदे गटाच्या गळाला लागले आहेत. आज हे दोन्ही नेते मुंबईत शिवसेना शिंदे गटात जाहीर पक्षप्रवेश करणार आहेत. त्यांच्या पक्षप्रवेशामुळे नाशिकमध्ये महापालिका निवडणुकीत शिवसेना शिंदे गटाची ताकद वाढणार आहे.

मिळालेल्या माहितीनुसार, नाशिकचे दोन माजी महापौर शिंदेंच्या शिवसेनेत प्रवेश करणार आहेत. माजी महापौर दशरथ पाटील आणि माजी महापौर अशोक मुर्तडक आज शिवसेनेचे धनुष्यबाण हाती घेणार आहेत. २००३- ०४ च्या कुंभमेळ्यावेळी महापौर असलेले दशरथ पाटील आणि २०१५- १६ च्या कुंभमेळ्यावेळी महापौर असलेले अशोक मुर्तडक आज शिवसेनेत प्रवेश करणार आहेत. पक्ष प्रवेशासाठी खासदार हेमंत गोडसे यांच्यासोबत दोन्ही माजी महापौर मुंबईकडे रवाना झाले आहेत.

आज दुपारी १२ वाजता उपमुख्यमंत्री एकनाथ शिंदे यांच्या उपस्थितीत दशरथ पाटील आणि अशोक मुर्तडक यांचा पक्षप्रवेश सोहळा पार पडणार आहे. माजी महापौर दशरथ पाटील यांचा मुलगा प्रेम पाटील शिवसेनेकडून सातपूरमधून निवडणुकीच्या रिंगणात उतरला आहे. तर अशोक मुर्तडक देखील निवडणूक लढत आहेत. अपक्ष निवडणूक मात्र शिंदेंच्या शिवसेनेनं मुर्तडक यांना पुरस्कृत केलंय.

दरम्यान, नाशिकमध्ये एकीकडे सत्ताधारी भाजप आणि शिंदेसेनेचा प्रचाराचा धुमधडाका सुरू आहे. तर ठाकरेंच्या सेनेकडून मात्र डोअर टू डोअर प्रचारावर भर दिला. ठाकरेंच्या सेनेचे महानगरप्रमुख आणि प्रभाग क्रमांक १५ चे उमेदवार प्रथमेश गीते डोअर टू डोअर फिरून प्रचार करत आहेत. रॅलीऐवजी डोअर टू डोअर प्रचारावर ठाकरेंच्या सेनेचा भर आहे. ऐन महापालिका निवडणुकीच्या तोंडावर भाजपने ठाकरेंच्या सेनेचे आणि मनसेचे मोहरे गळाला लावत दोन्ही पक्षांना धक्का दिला होता.