Ladki Bahin Yojana: लाडकी बहीणनंतर लाडकी बायको, सत्ताधाऱ्यांची निवडणुकीसाठी 'लाडकी बायको योजना

एकनाथ खडसेंनी सत्ताधारी नेत्यांवर केलेली ही टीका नीट ऐका... राज्यातील सत्ताधारी नेत्यांनी लाडकी बायको योजना सुरु केल्याचं खडसेंनी भरसभेत सांगितलं आणि राज्यात नेत्यांच्या बायकोशाहीची चर्चा सुरु झाली..

नगरपालिकांच्या निवडणुकीत, कार्यकर्ते गेले उडत, सत्ता आमच्या घरात, असंच चित्र राज्यात दिसून आलंय...कारण राज्यातील मंत्री, आमदार, खासदारांनी कार्यकर्त्यांना डावलून आपल्या बायकोलाच उमेदवारी दिलीय. कोणत्या कोणत्या सत्ताधारी नेत्यांनी बायकोला उमेदवारी देऊन सत्ता आपल्याच घरात ठेवण्याचा प्रयत्न केलाय ते पाहूयात...

जामनेरमधून गिरीश महाजन यांच्या पत्नी साधना महाजन यांना नगराध्यक्षपदाची उमेदवारी

भुसावळमधून मंत्री संजय सावकारेंच्या पत्नी रजनी सावकारेंना उमेदवारी

पुसदमधून राज्यमंत्री इंद्रनील नाईकांच्या पत्नी मोहिनी नाईक नगराध्यक्षपदासाठी रिंगणात

चाळीसगावचे आमदार मंगेश चव्हाण यांच्या पत्नी प्रतिभा चव्हाण यांना उमेदवारी

पाचोऱ्याचे आमदार किशोर पाटील यांच्या पत्नी सुनिता पाटील नगराध्यक्षपदासाठी रिंगणात

बुलढाण्यात आमदार संजय गायकवाड यांच्या पत्नी पूजा गायकवाड मैदानात

संगमनेरमध्ये आमदार सत्यजित तांबेंच्या पत्नी मैथिली तांबेही नगराध्यक्षपदासाठी मैदानात आहेत

एवढंच नाही तर घरात मंत्रिपद असतानाही अशोक उईके, आकाश फुंडकर, जयकुमार रावल यांच्यासह 33 नेत्यांनाही नगरपरिषद आणि नगरपालिकेची हाव सुटली नाही... या नेत्यांनी आई, मुलगी, भाऊ, पत्नी, बहीण यांना उमेदवारी दिलीय.मात्र .बायको योजनेची खडसेंची टीका मात्र नेत्यांच्या जिव्हारी लागलीय..

खरं तर देशातील सत्तेची केंद्र असलेल्या 149 कुटुंबांपैकी महाराष्ट्रातल्या 23 कुटुंबात आमदारकी आणि खासदारकी ही दोन्हीही पदं आहेत... हे कमी होतं की काय आता नगरपरिषद आणि नगरपंचायतीच्या निवडणुकीत त्यात आणखी 33 परिवारांची भर पडलीय..

एकीकडे कार्यकर्ता घरादारावर तुळशीपत्र ठेऊन नेत्यांना आमदारकी, खासदारकी मिळावी म्हणून धावपळ करतो... मात्र स्थानिक स्वराज्य संस्थांच्या निवडणुकीतील पदंही नेत्यांना आपल्याच घरात ठेवावी वाटत असतील तर कार्यकर्त्यांनी फक्त आयुष्यभर नेत्यांच्या सतरंज्याच उचलायच्या का? लोकशाहीच्या उत्सवात सत्ताधारी नेत्यांनी सुरु केलेली ही बायकोशाही कधी थांबणार, हा खरा सवाल आहे...