Weather Update: गणपती बाप्पाच्या आगमनाआधी पावसाची हजेरी; मुंबई, पुण्यासह 'या' जिल्ह्यांमध्ये मुसळधार पावसाचा अंदाज

Maharashtra heavy rain forecast before Ganeshotsav : गणेशोत्सवाच्या उत्साहात आणि बाप्पाच्या स्वागताच्या तयारीत असलेल्या नागरिकांसाठी तसेच गणेशभक्तांसाठी एक महत्त्वाची बातमी आहे. राज्याच्या अनेक भागांत गेल्या काही दिवसांपासून दडी मारलेला पाऊस पुन्हा एकदा जोर धरण्याची शक्यता हवामान विभागाने वर्तवली आहे.

बंगालच्या उपसागरातील कमी दाबाचे क्षेत्र आणि चक्राकार वाऱ्यांच्या स्थितीमुळे पुढील २ ते ३ दिवस राज्यात मुसळधार पावसाची शक्यता आहे. मेघगर्जना, विजांचा कडकडाट आणि ताशी ३० ते ५० किमी वेगाने वाहणाऱ्या वादळी वाऱ्यांसह जोरदार पाऊस हजेरी लावण्याचा अंदाज वर्तवला आहे.

मुंबई पुण्यासह राज्यात पावसाचा अंदाज:

मुंबई, ठाणे, पुणे, सोलापूर, चंद्रपूर आणि गडचिरोली या जिल्ह्यांमध्येही मेघगर्जना आणि विजांच्या कडकडाटासह पाऊस पडण्याची शक्यता वर्तवण्यात आली आहे. गेल्या काही दिवसांपासून उन्हाचा चटका आणि उकाडा सहन करणाऱ्या नागरिकांना या पावसाने काहीसा दिलासा मिळणार आहे.

कोणत्या जिल्ह्यात आज मुसळधार पावसाची शक्यता?

पालघर, जळगाव, नाशिक, छत्रपती संभाजीनगर, जालना, हिंगोली, नांदेड, वाशीम, अमरावती, यवतमाळ, वर्धा, ठाणे, मुंबई, रायगड, नंदूरबार, धुळे, अहिल्यानगर, पुणे, सोलापूर, बीड, परभणी, धाराशिव, लातूर, नागपूर, भंडारा, गोंदिया, चंद्रपूर, गडचिरोली.

जळगावमध्ये दीड महिन्यांनंतर दमदार पाऊस; वाऱ्यामुळे वीजपुरवठा खंडित

गेल्या महिना-दीड महिन्यापासून दडी मारलेल्या पावसाने रात्री हजेरी लावली. अवघ्या काही वेळातच या हलक्या सरींचे रूपांतर मुसळधार पावसात झाले. रात्री शहरात मुसळधार पाऊस कोसळला. या पावसासोबतच सुसाट वारा सुटल्याने वातावरणात प्रचंड गारवा निर्माण झाला. गेल्या काही दिवसांपासून सातत्याने जाणवणाऱ्या उकाड्यापासून जळगावकरांना अखेर दिलासा मिळाला.

मात्र, या अचानक आलेल्या मुसळधार पावसामुळे आणि सुसाट वाऱ्यामुळे शहरातील अनेक भागांतील वीजपुरवठा खंडित झाला होता. पावसाच्या या पुनरागमनामुळे शहरातील रस्त्यांवरून पाण्याचे लोट वाहू लागले. ऐन रात्रीच्या वेळी पावसामुळे रस्त्यांवर काही काळ पाणी साचले होते. लांबलेल्या पावसामुळे चिंतेत पडलेल्या शेतकरी वर्गाच्या चेहऱ्यावर मात्र या पावसाने काही प्रमाणात का होईना, आशेचे किरण निर्माण केले आहेत.