काँग्रेसनं विदर्भात भाकरी फिरवली! नव्या नेत्याकडे सोपवली प्रभारी जिल्हाध्यक्षपदाची जबाबदारी

शिक्षक व पदवीधर मतरदारसंघाच्या निवडणुकीनंतर महाराष्ट्र काँग्रेस पक्षात फेरबदल करत आहे. या नव्याने होत असलेल्या फेरबदलाची सुरुवात विदर्भापासून केलीय. काँग्रेस पक्षाने येथील प्रभारी जिल्हाध्यक्षाची नियुक्ती केलीय. ज्येष्ठ नेते पंकज गुड्डेवार यांची काँग्रेस कमिटीच्या प्रभारी जिल्हाध्यक्षपदी नियुक्ती करण्यात आलीय.

काँग्रेसचे प्रदेशाध्यक्ष हर्षवर्धन सपकाळ यांच्या आदेशान्वये ही नियुक्ती करण्यात आलीय. काँग्रेस पक्षाने हा आदेश शनिवारी (दि.२४) दुपारी जारी केला. काँग्रेसचे वरिष्ठ प्रदेश उपाध्यक्ष अॅड.गणेश पाटील यांनी गुड्डेवार यांच्या नियुक्तीचे पत्र जारी केलं. काँग्रेसचे विद्यमान जिल्हाध्यक्ष अॅड.विश्वजित कोवासे हे त्यांच्या आश्रमशाळेत झालेल्या विद्यार्थिनींच्या मृत्यूप्रकरणी सध्या कारागृहात आहेत. त्यामुळे प्रदेश काँग्रेसने पंकज गुड्डेवार यांची प्रभारी जिल्हाध्यक्षपदी नियुक्ती केली आहे.

पंकज गुड्डेवार हे विद्यार्थी दशेपासूनच काँग्रेस पक्षाशी जोडल्या गेले आहेत. १९९८ मध्ये ते एनएसयूआयचे जिल्हाध्यक्ष झाले. त्यानंतर २००१ ते २००६ पर्यंत त्यांनी एनएसयूआयचे राष्ट्रीय महासचिव म्हणून जबाबदारी पार पाडली आहे. त्यानंतर ते युवक काँग्रेसचे प्रदेश उपाध्यक्ष झाले. त्यानंतर निवडणुकीद्वारे युवक काँग्रेसचे प्रदेश सरचिटणीस, काँग्रेसचे जिल्हा सचिव अशा विविध पदांची जबाबदारी त्यांनी संभाळलीय.

विविध राज्यांमध्ये झालेल्या विधानसभा निवडणुकीत त्यांनी अखिल भारतीय काँग्रेस कमिटीचे पक्ष निरीक्षक म्हणूनही काम केलंय. २०२० पासून ते काँग्रेसचे प्रदेश सचिव म्हणून कार्यरत आहेत. आता पक्षाच्या प्रभारी जिल्हाध्यक्षपदी त्यांची नियुक्ती करण्यात आलीय. गुड्डेवार यांच्यासारख्या अनुभवी नेत्याकडे पक्षाची धुरा आल्याने पक्ष बळकट होईल, असा विश्वास कार्यकर्त्यांनी व्यक्त केलाय.