Ladki Bahin Yojana: रखडलेल्या हप्त्यासाठी महिलांचा राडा; लाडकींचे पैसे नेमके गेले कुठे?

एकदा, दोनदा नाही, तर वारंवार सरकारी कार्यलयाच्या चकरा मारूनही खात्यात पैसे येत नसल्याने जळगावात लाडक्या बहिणींचा संयम सुटला. आणि थेट बालविकास कल्याण केंद्रात धडक मारली. आमचे पैसे कुठे गेले?" असा जाब विचारत लाडकींनी सरकारी अधिकाऱ्यांना धारेवर धरलं.

राज्य सरकारची महत्त्वाकांक्षी लाडकी बहीण योजना जळगावात वादाच्या भोवऱ्यात का अडकली.पाहूयात. जळगाव जिल्ह्यात एकूण 10 लाखाहून अधिक महिला लाडकी बहीण योजनेसाठी पात्र ठरलेत. मात्र KYC केल्यानंतर 1 लाखाहून अधिक महिलांच्या खात्यात पैसे जमा न झाल्यानं महिलांचा उद्रेक झालाय. दुसरीकडे ई-केवायसीत झालेल्या चुकांमुळे लाडक्या बहिणींच्या खात्यात येणारे पैसे थांबल्याचं अधिकाऱ्यांनी सांगितलयं.

बोगस लाडकींमुळे सरकारी तिजोरीवर ताण येत असल्यानं शासनानं योजनेतील लाभार्थ्यांची काटेकोर छाननी सुरु केली. ई-केवायसी बंधनकारक करून बोगस लाडकींची नावे योजनेतून वगळण्यात आली.. अशातच वर्षभरात राज्य सरकारचे तब्बल 165 कोटी रुपये अपात्र लाभार्थ्यांनी लुटल्याची माहिती महिला व बालविकास मंत्री अदिती तटकरे यांनी दिली होती. अशात लाडकीचा लाभ बंद झाल्यावर जळगावात महिला आक्रमक झाल्यानं ई- केवायसी प्रक्रिया जलद आणि अचुक पद्धतीनं राबवण्याचं आव्हान शासनापुढे उभं राहिलयं.